Старшыня Нацыянальнага статыстычнага камітэта Іна Мядзведзева распавяла на прэс-канферэнцыі аб кур'ёзных момантах пры адказах удзельнікаў пробнага перапісу ў Маладзечанскім раёне на пытанні перапісных лістоў, перадае БелТА.
Кіраўніца Белстата адзначыла, што ў асноўным пытанні ў перапісных лістах былі зразумелыя насельніцтву. Разам з тым цяжкасці ўзнікалі пры адказах на пытанні аб занятасці і сельгасдзейнасці. «У прыватнасці, адказваючы на пытанні па сельскагаспадарчай дзейнасці, удзельнікі пробнага перапісу казалі аб наяўнасці ў іх у гаспадарцы сабачак і коцікаў — маўляў, чаму іх не перапісалі, — сказала Іна Мядзведзева. — Такія адказы, вядома, не заносіліся ў апытальнік».
«Выкарыстанне планшэтаў прыводзіць да таго, што адказы тыпу «нацыянальнасць — эльф» (як гэта здаралася пры правядзенні перапісу насельніцтва ў Расіі падчас запаўнення перапісных лістоў на папяровых носьбітах) не прымаюцца праз электронны фармат апрацоўкі даных», — патлумачыла старшыня Нацыянальнага статыстычнага камітэта.
Пробны перапіс насельніцтва прайшоў у Маладзечанскім раёне Мінскай вобласці з 2 па 13 кастрычніка. Гэта важны падрыхтоўчы этап перапісу насельніцтва Беларусі 2019 года. Кіраўніца Белстата адзначыла, што выкарыстанне планшэтаў апраўдала сябе ў поўнай меры: запаўненне перапісных лістоў у электронным фармаце склала ў сярэднім каля пяці хвілін — гэта ў тры разы хутчэй, чым пры запаўненні перапісных лістоў на папяровых носьбітах.
Каментары