Хакеісты зборнай Беларусі абыгралі ў авертайме Францыю з лікам 3: 2 (0: 2, 1: 0, 1: 0, 1: 0) на этапе «Еўрачэленджа» у Сержы, паведамляе карэспандэнт БелТА.
Беларусы прапусцілі двойчы ў першыя дваццаць хвілін гульні. У супернікаў дакладныя кідкі ў свой актыў запісалі Стэфан Да Коста і Аліўе Дам-Малька. Пасля перапынку падапечныя Дэйва Льюіса намаганнямі Джэфа Плата ў сярэдзіне другога перыяду змаглі адыграць адно ачко - 1: 2.
На 48-й хвіліне матчу Дзмітрый Дзярабін паспеў на дабіванне шайбы і зрабіў лічбы на табло роўнымі - 2: 2.
Асноўны час сустрэчы завяршыўся ўнічыю, а ў дадатковым перыядзе дакладны кідок Андрэя Бялевіча прынёс перамогу беларусам - 3: 2.
У першым туры ў Сержы беларуская каманда саступіла 5: 7 Латвіі. У заключны дзень турніру, 11 лістапада, беларусы сустрэнуцца з камандай Славеніі.
Турнірнае становішча: 1. Латвія - 6 ачкоў (2 матчы), Беларусь - 2 (2), Славенія - 2 (2), Францыя - 2 (2).
Каментары