Статкевіч пра Дзень Волі: Я гатовы на кампраміс, але шэсце абавязкова мусіць быць
Былы палітвязень і кандыдат у прэзідэнты Мікалай Статкевіч пракаментаваў прапановы ўладаў адносна святкавання Дня Волі ў цэнтры горада, але без шэсця па вуліцах.
«Я гэта пакуль што называю «нібыта прапановы». Афіцыйнага адказу мы не атрымалі, ніхто не выклікаў на размову заяўнікаў акцыі. Гэта ўсё было сказана толькі аднаму з сяброў аргкамітэта. Маўляў, адмоўцеся ад шэсця па цэнтры горада на карысць мітынга і канцэрта ў парку Янкі Купалы. Мы будзем абмяркоўваць гэтыя «прапановы» сёння ўвечары.
Калі браць Дзень Волі, то гэта дзень свабоды. І Дзень Волі ў барацьбе за нашую свабоду. Мы заўсёды змагаліся за незалежнасць у гэты дзень, дэманстравалі сваю рашучасць, у тым ліку праз шэсце. За выключэннем толькі тых гадоў, калі ўлады гвалтам спынялі шэсці, як было летась.
Пагроза нашай незалежнасці не памяншаецца. Магчыма, з часам будзе нават павялічвацца. І сёння вельмі важна прадэманстраваць гэтую рашучасць. Гэта ляманты напалоханых, стомленых людзей: «Давайце святкаваць!» Калі мы будзем толькі святкаваць, то можа аказацца, што святкаваць няма чаго і Беларусь страціла незалежнасць.
Мая пазіцыя, што святкаванне 100-годдзе БНР павінна паказаць рашучасць беларусаў у абароне незалежнасці краіны. Фармат святкавання павінен адпавядаць гэтай мэце.
Шэсце павінна быць. Калі гэта ўсё ж прапанова, то я вітаю гатовасць уладаў да кампрамісаў. Я гатовы прыняць іх прапанову наконт месца завяршэння акцыі ў парку. Натуральна, што плошча Свабоды больш адпавядае і месцам, і назвай, але, калі ўлады ідуць насустрэч, то што ж, мы можам зразумець іх матывы.
Хай мяне асудзяць калегі, але я гатовы прыняць гэтае месца для завяршэння акцыі. Усё ж жыццё часам патрабуе кампрамісаў. Я б пагадзіўся на Оперны, як месца завяршэння. Мы маглі прайсці шэсцем ад плошчы Якуба Коласа да Опернага — гэта мая пазіцыя.
Я не разумею кіраўнікоў палітычных партый, якія ўхапіліся за ўкінутае меркаванне, што «давайце святкаваць». А давайце пойдзем гарэлку піць па хатах. Калі ласка, ідзіце! У каго ёсць мужасць і годнасць, то давайце разам праявім яе, а пасля пойдзем у кавярні. У каго няма мужнасці і годнасці, то ідзіце адразу піць. І не замінайце тым, хто захаваў у сабе гэтыя якасці».
Каментары