Лукашэнка заявіў, што ў Еўропе бяда з прадуктамі і ёсць гатоўнасць дапамагчы
«Калі ў Еўропе з прадуктамі бяда ў сувязі з гэтай засухай, трэба патроху з імі супрацоўнічаць».
Аляксандр Лукашэнка падчас рабочай паездкі ў Мінскі раён выказаўся за тое, каб «і ў цяперашняй няпростай сітуацыі» імкнуцца выбудоўваць з заходнімі суседзямі дзелавыя сувязі і супрацоўніцтва, піша БелТА.
«Трэба нам супрацоўнічаць з суседзямі. І з палякамі, і з літоўцамі, латышамі. У гэтай сітуацыі, калі ў Еўропе з прадуктамі бяда ў сувязі з гэтай засухай, трэба патроху з імі супрацоўнічаць. Суседзі ёсць суседзі. Калі мы не толькі глядзім праз прыцэл адзін на аднаго, але і пачынаем эканамічна супрацоўнічаць, гэта сведчыць пра тое, што нам, магчыма, і вайны ўдасца пазбегнуць», — сказаў ён.
Таксама Лукашэнка пракаментаваў пратэсты школьнікаў у Францыі.
«Мы не радуемся, я не апладзірую таму, што адбываецца ў Францыі, у адрозненне ад нашых журналістаў. Бо гэта недапушчальна. Гэта тое самае, што ў нас было (у 2020 годзе), — палітыкі выкарыстоўваюць дзяцей у палітычных мэтах. Што тут добрага? Вядома, Макрон жорстка спыняе гэтыя рэчы, — адзначыў ён. — Адзінае, у чым іх можна папракнуць: чаму ж, калі гэта адбывалася ў нас, для іх гэта было добра, а калі тое самае адбываецца ў іх, гэта ўжо дрэнна? Разумееце — двайныя стандарты».
Аляксандр Лукашэнка падкрэсліў, што недапушчальна такім чынам выкарыстоўваць дзяцей у палітычных мэтах.
«Ну што, яму 12—15 гадоў. Чым ты незадаволены? Ты яшчэ жыць не пачаў. Відавочна, што палітыкі выкарыстоўваюць іх у сваіх мэтах. У сакавіку выбары ў Францыі. Думаю, нешта супакоіцца. Але асабліва радавацца гэтаму не трэба. Адзінае, вядома, ім трэба паказваць пальцам: хлопцы, а чаго вы радаваліся, калі ў нас выкарыстоўвалі гэтых дзяцей?» — дадаў ён.
Каментары
Але слухачы ў Мінскім раёне, напэўна, былі ўражаныя, як Бацька рухае галактыкамі.