Армія прыняла на ўзбраенне лазер «Шафран» беларускай распрацоўкі для знішчэння дронаў
Паводле Дзяржкамваенпрама, комплекс выяўляе беспілотнікі на адлегласці да 4,5 кіламетра і паражае іх лазерным прамянём на дыстанцыі да 1,5 кіламетра. Улады называюць яго айчыннай распрацоўкай, але ўкраінскія аналітыкі заўважалі падабенства з кітайскай сістэмай.
Пра прыняцце «Шафрана» на ўзбраенне паведаміў старшыня Дзяржаўнага ваенна-прамысловага камітэта Дзмітрый Пантус у эфіры «Беларусь 1».
«Лазерны комплекс «Шафран» айчыннай вытворчасці паспяхова прыняты на ўзбраенне», — заявіў ён.
Паводле Пантуса, цяпер комплекс мадэрнізуюць, каб павялічыць магутнасць, далёкасць дзеяння і палепшыць іншыя характарыстыкі.
«Шафран» абсталяваны радарам і оптыка-электроннымі сродкамі для выяўлення дронаў. Замест ракеты ці снарада ён выкарыстоўвае лазерны прамень.
Пра выпрабаванні комплексу Дзяржкамваенпрам паведамляў у лістападзе 2025 года. Паводле ведамства, яго эфектыўнасць дэманстравалі падчас вучэнняў «Захад-2025». Распрацоўкай займаўся Навукова-тэхнічны цэнтр «ЛЭМТ» БелОМА на замову Дзяржкамваенпрама.
Аднак украінскае выданне Defense Express яшчэ ў верасні 2025 года выказала меркаванне, што ў аснове «Шафрана» могуць быць кітайскія тэхналогіі, у прыватнасці сістэма Silent Hunter.
Аналітыкі параўналі апублікаваныя выявы інтэрфейсаў кіравання і адзначылі іх падабенства, а таксама аднолькавы спецыфічны ракурс камеры. Яшчэ адным аргументам яны назвалі кароткі тэрмін распрацоўкі: на момант дэманстрацыі «ЛЭМТ» афіцыйна працаваў над комплексам менш за год.
Цяпер чытаюць
«Пакінулі на некалькі гадзін аднаго на вакзале». Мужчына памёр пасля падзення з вышыні на працы1
«Пакінулі на некалькі гадзін аднаго на вакзале». Мужчына памёр пасля падзення з вышыні на працы
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары
Але вангую, што зараз вылезе Жыгар і пачне лямантаваць, што прадпрыемствы, якія вырабляюць гэтыя лазеры (Навукова-тэхнічны цэнтр «ЛЭМТ» БелОМА ), "законная цэль для Украіны".