Былы палац Радзівілаў у вёсцы Паланечка Баранавіцкага раёна выстаўлены на продаж са зніжэннем цэны на 80%, паведамляе БелТА. Паўторны адкрыты аўкцыён па продажы гісторыка-культурнай каштоўнасці прызначаны на 29 мая.
Пачатковы кошт продажу складае 19 210 рублёў. Зямельны ўчастак плошчай 3,3 га прадастаўляецца ў арэнду тэрмінам на 50 гадоў. Па ўмовах продажу новы ўласнік абавязаны будзе правесці рэканструкцыю (рэстаўрацыю) аб'екта ў абумоўленыя тэрміны, падпісаць і зарэгістраваць у Міністэрстве культуры ахоўнае абавязацельства і выкарыстоўваць аб'ект на працягу трох гадоў з моманту ўводу ў эксплуатацыю.
Будынак былога палаца Радзівілаў выстаўляецца на таргі са зніжэннем цэны на 80% у чацвёрты раз. У цэлым жа Баранавіцкі райвыканкам спрабуе прадаць аб'ект з 2013 года. За гэты час яго кошт знізіўся практычна ў шэсць разоў.
Палац у вёсцы Паланечка з'яўляецца помнікам архітэктуры класіцызму. Ён быў пабудаваны ў другой палове XVIII стагоддзя па загадзе Мацея Радзівіла як копія італьянскай вілы Трывулзіна. Нашчадкі Радзівілаў жылі ў Паланечцы да 1939 года. Пасля вайны ў палацы размяшчалася школа-інтэрнат. З 1999 года ён пустуе.
Цяпер чытаюць
Анжаліку Мельнікаву бачылі ў Мінску ў «Дана Моле»58
Каментары