Мусульмане Амэрыкі за Абаму

Цяпер, калі Амэрыка наважвае за каго прагаласаваць, Барака Абаму ці Джона Макейна, здаецца, усе этнічныя і рэлігійныя сэктары ЗША ўжо былі абмеркаваныя ў СМІ на прадмет перадвыбарчых сымпатыяў. Але што з амэрыканскімі мусульманамі, за каго яны?

Паводле праграмы «Ньюзбіт» на радыё ВВС большасьць з 4-х мільёнаў амэрыканскім мусульманаў падтрымліваюць дэмакратычнага кандыдата. Часткова кіруючыся фальшывай пагалоскай, згодна зь якой Барак Гусэйн Абама — мусульманін, пагалоскай, якую лягер рэспубліканцаў, дарэчы, выкарыстоўвае супраць дэмакратычнага кандыдату на працягу ўсёй кампаніі. Часткова ў выніку хвалі варожасьці і падазронасьці ў дачыненьні да мусульманаў пасьля тэрарыстычнай атакі 11 верасьня. І часткова — з-за прэзыдэнта-рэспубліканца, які востра ганіць экстрэмісцкія мусульманскія групы.

Традыцыйна склалася, што амэрыканскія мусульмане абіраюць рэспубліканца, але гэтыя выбары, вельмі адмысловыя ў шмат якіх аспэктах, адрозныя і што да сымпатыяў мусульманаў. Цяпер, на тле эканамічнага крызысу, большасьць амэрыканскіх мусульманаў аддаюць перавагу Бараку Абаме. «Нам баліць назіраючы за вайной у Іраку, у якой дарэмна гінуць тысячы людзей», — кажа Ізым Кагэн, нью-ёрскі мусульманін, і дадае: «Праз апошнія восем гадоў мы больш ня можам галасаваць за рэспубліканца».

А што Абама? Хрысьціянін, які пражыў 4 гады ў мусульманскай Інданэзіі, усё ж катэгарычна пратэстуе, калі яго імя ў прэсе зьвязваюць з мусульманскай верай. На мітынгу, які ладзіла дэмакратычная партыя ў Дэтройце, дваіх глядачак, якія мелі традыцыйныя мусульманскія хусткі на галовах, настойліва папрасілі не стаяць за сьпінай у Барака, каб аб’ектывы камэраў выпадкова не паздымалі іх разам з кандыдатам. Вядома, адразу пасьля выпадку Абама перапрасіў жанчынаў, але іхнія пачуцьці былі ўжо абражаныя.

У падтрымку мусульманаў Амэрыкі выступіў менавіта рэспубліканец са стажам, Колін Паўэл, былы міністар абароны і герой вайны ў Пэрсыдзкай затоцы, што ў дадатак досыць нечакана падтрымаў дэмакрата Абаму. «Я стурбаваны чуць ад рэспубліканцаў перадвыбарчыя прамовы кшталту: «Ну, вы ж ведаеце, Абама — мусульманін». Дык вось, правільны адказ такі Абама — не мусульманін, Абама — хрысьціянін. Але тут жа паўстае пытаньне: «Але што тут такога, калі б ён быў бы мусульманінам? Ці варта наагул турбавацца, што чалавек ў гэтай краіне ёсьць мусульманінам? Адказ — не, ня варта. Прынамсі ня ў нашай Амэрыцы».

• 0
• 0
• 0
• 0
• 0
• 0
• 0
• 0