Жыхарку расійскага Тальяці прысудзілі да 14 гадоў. Размовы з ёй пра Украіну знаёмы на спатканнях запісаў на дыктафон і аднёс у ФСБ

Яе судзілі адразу па шасці артыкулах КК РФ, у тым ліку аб падрыхтоўцы да дзяржаўнай здрады, закліках да тэрарызму, фінансаванні тэрарызму і «ваенных фэйках». Пракуратура запрашвала для 27‑гадовай Еўтушэнка, якая адна выхоўвае сямігадовую дачку, 18 гадоў калоніі.

«Я ніколі не здзяйсняла ніякай дзяржаўнай здрады. Я люблю сваю радзіму — Расію, і ніколі не зраблю нічога такога, што б ёй нашкодзіла. Калі я і зрабіла нейкія памылкі ці парушэнні, то знаходжанне мяне ў месцах зняволення на працягу амаль трох гадоў — гэта ўжо больш чым дастатковае пакаранне. Прашу вас вынесці справядлівае рашэнне і адпусціць мяне да маёй дачкі», — сказала Еўтушэнка ў апошнім слове ў судзе

У аснову крымінальнай справы ляглі антываенныя допісы ў сацсетках і паказанні Мікалая Камарова, якога СМІ называлі правакатарам.

Падчас дружалюбных спатканняў ён запісваў на дыктафон іх размовы, а пасля аднёс запісы ў ФСБ.

Еўтушэнка затрымалі летам 2023 года на выхадзе з дзіцячага садка, куды яна адводзіла сваю пяцігадовую дачку. «Абярнуўшыся, я ўбачыла, што нада мной стаіць больш за 10 мужчын у цывільным адзенні. Мне надзелі пластыкавую сцяжку на рукі і кінулі ў машыну так, нібы я мех з бульбай», — распавядала яна ў лісце, апублікаваным «Холадам».

Жыхарка Тальяці была арыштаваная па рашэнні суда ў ліпені 2023 года. Яе западозрылі ў тым, што яна «схіляла жыхара Самары да здзяйснення дзяржаўнай здрады ў форме пераходу на бок праціўніка, а менавіта да ўступлення ва ўзброенае фарміраванне — легіён «Свабода Расіі»», які ў Расіі аб'яўлены тэрарыстычнай арганізацыяй і забаронены.

Пазней у справе з'явілася яшчэ пяць артыкулаў: аб закліках да тэрарызму, аб закліках да экстрэмізму ў інтэрнэце, аб фінансаванні тэрарызму, аб «ваенных фэйках» і аб «рэабілітацыі нацызму».

У агульнай складанасці па выстаўленых абвінавачваннях Еўтушэнка пагражала да 22,5 гадоў калоніі. Віну яна не прызнала. З сакавіка 2024 года справу разглядаў Цэнтральны акруговы ваенны суд, які знаходзіцца ў Екацярынбургу, пасяджэнні праходзілі ў Самары.

Паводле звестак «Холаду», справа будавалася на паказаннях 36‑гадовага Камарова, з якім яна пазнаёмілася ў сацсетках за паўгода да затрымання.

«Я хадзіла на дружалюбныя спатканні, а потым аказалася, што гэты чалавек запісваў нашы размовы на дыктафон з самой першай сустрэчы. Ён задаваў мне кучу пытанняў пра іх [легіён «Свабода Расіі»], а я яму адказвала. Запісы абрэзаныя. Моманты, якія маглі б апраўдаць мяне — выключаны, і гэта чутна, бо размовы проста абрываюцца», — пісала Еўтушэнка ў лісце карэспандэнту «Холаду».

Паводле інфармацыі выдання, Камароў быў валанцёрам самарскага штаба Аляксея Навальнага, а потым запісваў крытычныя ролікі аб працы апазіцыянераў.

У мужчыны ёсць некалькі судзімасцяў па справах аб крадзяжы, гаварылася ў публікацыі «Холаду». Паводле звестак «Першага аддзела», на пасяджэнні суда Камароў пацвердзіў, што ў яго ёсць судзімасць.

Еўтушэнка з самага пачатку расійскага ўварвання ва Украіну займала антываенную пазіцыю, пра што неаднаразова пісала ў сваіх сацсетках. Паводле звестак СМІ, яна публікавала спасылку на петыцыю з патрабаваннем імпічменту прэзідэнта Уладзіміра Пуціна на платформе change.org, фатаграфіі грашовых купюр з антываеннымі надпісамі і іншыя матэрыялы.

Як сцвярджае ФСБ, Еўтушэнка «праводзіла агітацыйную працу», «размяшчала прапагандысцкія матэрыялы, якія ствараюць станоўчы вобраз структурнага падраздзялення УСУ», а таксама публікавала «інструкцыі для расійскіх вайскоўцаў па здачы ў палон».

У пачатку ліпеня 2023 года, незадоўга да затрымання і арышту, Еўтушэнка апублікавала ў сябе ў інстаграме фота з міністрам эканамічнага развіцця Самарскай вобласці Дзмітрыем Багданавым: гэта фатаграфія з цырымоніі ўручэння дыпломаў выпускнікам праграмы для маладых прадпрымальнікаў. Яна была адной з удзельніц праграмы.

Еўтушэнка ў СМІ часта называюць «дзяўчынай з сінімі валасамі». У гэты колер, мяркуючы па ўсім, яна пафарбавала валасы пасля пачатку расійскага ўварвання ва Украіну. На фота ў сацсетках яна апранута ў жоўты строй.

• 1
• 0
• 0
• 4
• 1
• 4
• 15
• 0