Пад фінал ЧС па футболе. Рэцэпт класічнай «Маргарыты», якую лёгка пераўтварыць у любую іншую піцу
У нядзелю многія збіраюцца правесці вечар каля экрана з трансляцыяй футбольнага матча. І калі вы таксама не разглядаеце іншы варыянт баўлення часу, то мая вам парада, як падрыхтавацца: падумайце загадзя пра перакус, каб нічога не адцягвала вашу ўвагу падчас гульні.
Я лічу найлепшым суправаджэннем праглядаў піцу: яе лёгка прыгатаваць, яна вельмі пажыўная, а варыянтаў начыння проста нямерана.
Тут вы знойдзеце рэцэпт класічнай «Маргарыты», у якую лёгка можна дадаць любыя ўлюблёныя вамі інгрэдыенты: розныя сыры, каўбасу, курыцу, грыбы, анчоусы і гэтак далей. Смачна есці!
Для цеста:
- 500 гр. мукі;
- 0,5 ч. л. солі;
- 7 гр. сухіх дрожджаў;
- 0,5 ст. л. цукру;
- 2 ст. л. аліўкавага алею.
*Для цеста піцы лепш за ўсё браць моцную муку: з утрыманнем бялку больш за 11 гр. на 100 гр. мукі.
Муку прасейваем горкай, дадаём соль.
У асобнай місцы змешваем 320 мл цёплай вады, дрожджы, цукар і алей. Пакідаем на некалькі хвілін, каб актывізаваць дрожджы.
Потым выліваем сумесь на муку і месім цеста. Кладзём яго пасля ў міску, прысыпаем мукой і накрываем ручніком.
Пакідаем прыкладна на гадзіну ў цёплым месцы — за гэты час цеста вырасце прыкладна ўдвая.
Соус:
- 1 слоік кансерваваных памідораў ва ўласным соку;
- 1 зубчык часнаку;
- жменя лісця базіліку;
- соль, перац;
- на смак — каперсы і чырвоны перац.
Часнок дробна наразаем і крыху падсмажваем на алеі. Далей таўчом кансерваваныя памідоры і ўкідваем іх да часнаку. Варым соус 10 хвілін на маленькім агні, часам памешваючы. Пры канцы дадаём базілік, соль і спецыі.
Цеста дзелім на дзве часткі, абмінаем і раскатваем рукамі ў круг. Пераносім цеста на бляху, якую загадзя змазваем алеем. Пакідаем так яшчэ на хвілін 10. Зверху выкладваем соус і дадаём кавалкі мацарэлы.
Выпякаем 10 хвілін пры 220 градусах.
Цяпер чытаюць
Статкевіч пра «Ноч музеяў» у Мінску: Мы зразумелі, што людзі апладзіравалі не саксафаністу, а нам з жонкай6
Статкевіч пра «Ноч музеяў» у Мінску: Мы зразумелі, што людзі апладзіравалі не саксафаністу, а нам з жонкай
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?11
Каментары