Упраўленне ўнутраных спраў Гомельскай вобласці аб'явіла ў вышук расійскага журналіста Іллю Даўлятчына па абвінавачанні ў садзейнічанні «экстрэмізму». У канцы 2024 года яго аб'явілі ў вышук у Расіі.
Як паведаміў тэлеграм-канал «Можем объяснить», які звязаны з Іллёй Даўлятчыным, адпаведную даведку журналісты атрымалі з Міністэрства ўнутраных спраў Расіі.
«Паводле правіл Саюзнай дзяржавы, пры заведзенні справы ў Беларусі фігурант аўтаматычна трапляе ў базу вышуку ў Расійскай Федэрацыі. У даведцы адзначаецца, што ў вышук яго аб'явіла 25 лістапада 2024 года УУС Гомельскай вобласці па артыкуле 361-4 ч. 2 КК РБ — «Садзейнічанне экстрэмісцкай дзейнасці групай асоб паводле папярэдняй змовы», паводле якога пагражае тэрмін ад 3 да 7 гадоў пазбаўлення волі», — адзначаецца ў паведамленні.
У той жа час пра вышук Даўлятчына спачатку стала вядома ў Расіі, але тады журналіст казаў, што нічога не ведае пра крымінальную справу. У лістападзе 2023-га Мінюст Расіі аб'явіў яго «замежным агентам». Пазней стала вядома, што суд у Вялікім Ноўгарадзе прызначыў журналісту штраф у памеры 30 тысяч рублёў.
Прычынай для крымінальнага пераследу стаў удзел расійскага журналіста ў адной з праграм тэлеканала «Белсат», які ў Беларусі прызналі «экстрэмісцкім фарміраваннем», а ў Расіі — «непажаданай арганізацыяй». Ілля Даўлятчын не з'яўляецца грамадзянінам Беларусі, а ў базе вышуку МУС Беларусі яго прозвішча адсутнічае.
Ілля Даўлятчын — журналіст-расследавальнік і вядоўца штотыднёвай праграмы «Можем объяснить». У розныя гады ён супрацоўнічаў з газетай «Собеседник», выданнем «Вёрстка», інфармагенцтвам «Росбалт», тэлеканалам «Дождь».
Цяпер чытаюць
Той самы масажыст расказаў, навошта здымаў голых кліентак2
Каментары