Віктар Пракапеня патлумачыў, што было б з Беларуссю ў выпадку захопу Расіяй
На ютубе з'явіўся новы канал відэагутарак «Баранцава. Інтэрв'ю». Яго вядучая — супрацоўніца радыё «Гумар ФМ» Анастасія Баранцава.
Пакуль яна апублікавала дзве гутаркі — з бізнэсменамі Аркадзем Ізраілевічам і Віктарам Пракапенем.
Адзін з цікавых момантаў размовы з Пракапенем датычыўся імавернага аб'яднання Беларусі і Расіі.
Пытанне ўзнікла пасля адказу Пракапені пра тое, якой колькасцю нерухомасці валодае ягоная кампанія ў Мінску.
Прыводзім стэнаграму:
Вядучая: […] У вас не было такіх думак, што некалі наша краіна раптам аб’яднаецца з якой-небудзь іншай краінай? І тады той, хто валодае нерухомасцю, можа проста ўжо не працаваць да канца свайго жыцця. Не было ў вас такіх думак?
Пракапеня: Я вам скажу, першае: што ніколі нашая краіна не ўвойдзе ў склад іншай краіны. Прынамсі, пакуль у нас цяперашні прэзідэнт. Гэта раз. Два: што датычыць таго, калі «раптам» нашая краіна ўвойдзе ў склад іншай краіны, той краіны, пра якую вы думаеце, — Расію.
Вядучая: Пра Расію.
Пракапеня: Так, пра Расію.
Вядучая: Хацелася б, канечне.
Пракапеня: То гэтая нерухомасць не будзе каштаваць нічога. Таму што…
Вядучая: Чаму?
Пракапеня: Гляньце, што адбылася ў Крыме: Крым на сёння стаў такой чарнобыльскай зонай. Крымчукі не могуць перасоўвацца нармальна — ім не даюць візы. На людзей, якія інвестуюць у Крым, накладваюць санкцыі. Туды сусветная супольнасць [не ідзе]… Сістэма міжнароднага права так уладкавана, што захапіць частку чужой краіны або там яна ўвойдзе ў склад…
Вядучая: Мы ж не кажам пра захоп, мы кажам добраахвотнае аб’яднанне. Які захоп?
Пракапеня: Ніхто такое «добраахвотнае» аб’яднанне не прызнае.
Вядучая: Вы забываеце, што ў Крыме прайшоў рэферэндум.
Пракапеня: Безумоўна. Рэферэндум, які Беларусь не прызнала.
Вядучая: Беларусь у гэтым дачыненні выдатная: не прызналі, але пры гэтым яны і не за, і не супраць.
Пракапеня: Беларусь не прызнала рэферэндум. Такі сцэнар прывядзе да таго, што кожнаму беларусу стане жыць нашмат горай. Такі сцэнар прывядзе да таго, што ўся гэтая тэрыторыя будзе пад санкцыямі і інвеставаць сюды будзе немагчыма. Нічога добрага ў такім сцэнары не будзе.
Вядучая: Я ж не тое што… Я, напрыклад, не за…
Пракапеня: Ну вы ж гаворыце…
Вядучая: Але прэзідэнт сказаў… [далей цытуецца фрагмент выступу Лукашэнкі].
Пракапеня: Задача кожнага зрабіць максімальна, што ад яго залежыць, каб прыносіць большую карысць, ствараць большую колькасць эканамічных каштоўнасцяў, каб нашая краіна была больш незалежнай. І зноў жа, калі такое адбудзецца, то беларуская нерухомасць не будзе каштаваць нічога, бо яна не будзе патрэбна нікому.
Вядучая: Калі адбудзецца захоп? Вы гэта маеце на ўвазе?
Пракапеня: Калі адбудзецца любога кшталту аб’яднанне, якое не будзе прызнана сусветнай супольнасцю.
***
У размове з «Нашай Нівай» Баранцава запэўніла, што насамрэч казала, што ёй «не хацелася б».
«Там магло пачуцца, сапраўды. Я насамрэч сказала, што мне не хацелася. Я ўвогуле думаю, што добры інтэрв'юер — той, які не каментуе і толькі пытае», — сказала вядучая.
Каментары