У сацыяльна-адукацыйным праекце «Малочная акадэмія» ўзялі ўдзел чатыры сталічныя гімназіі, вучням якіх давалі асновы правільнага харчавання і тлумачылі важнасць малочных прадуктаў.
Праект, арганізаваны кампаніяй «Савушкаў прадукт», дзейнічаў у Мінску з верасня па снежань 2018 года. Падлеткам расказалі і паказалі, як атрымліваць ад ежы не толькі задавальненне, але і карысць. У праекце ўзялі ўдзел навучэнцы гімназій №56, №12 і №11, а завяршыўся праект майстар-класамі ў гімназіі №1 Мінска.
Місія «Малочнай акадэміі» — дапамагчы школьнікам клапаціцца пра здароўе і правільна харчавацца. У прыватнасці, вучні даведаліся пра ролю малочных прадуктаў у штодзённым рацыёне і спосабах пазбегнуць праблем з абменам рэчываў.
Каб дагрукацца да школьнікаў, майстар-класы праводзілі вядомыя беларусы. Тытулаваная лёгкаатлетка Аліна Талай і блогерка Ганна Бонд падзяліліся сакрэтамі харчавання і трэніровак. А шэф-кухар Таццяна Назарук проста перад гімназістамі гатавала малочныя сняданкі. Замацаваць веды можна было ў інтэлектуальнай гульні «Мозгва», а здаволіць голад — на «малочнай станцыі падзарадкі». Самыя актыўныя школьнікі атрымалі абанементы ў фітнэс-клуб і іншыя прыемныя бонусы.
Кіраўніцтва гімназій пацвердзіла важнасць праекта для папулярызацыі правільнага харчавання сярод падлеткаў. «Такія метады працы зразумелыя падлеткам і падабаюцца ім. Адно такое мерапрыемства «Малочнай акадэміі» па эфектыўнасці можа, напэўна, замяніць усё тое, што за апошнія 9—10 гадоў спрабавалі данесці на класных гадзінах, распавядаючы пра важнасць здаровага ладу жыцця», — патлумачыла дырэктар гімназіі №11 Мінска Вольга Бойка.
«Праект «Малочная акадэмія» мусіць паказаць школьнікам, што харчавацца правільна можа быць лёгка і смачна. Але каб зрабіць гэта эфектыўна, мы размаўлялі з падлеткамі на іх мове і ўсе парады стараліся ілюстраваць сваім прыкладам. З гэтай прычыны майстар-класы праводзілі паспяховыя людзі, якія сочаць за сваім рацыёнам і ведаюць перавагі ЗЛЖ. Як сведчаць вынікі апытанняў, і гэта вельмі важна, старшакласнікі не толькі атрымалі парады і навучыліся гатаваць малочныя стравы, але і сталі задумвацца пра сваё здароўе», — падкрэсліла намеснік гендырэктара кампаніі «Савушкаў прадукт» Алена Бабкіна.
«Малочная акадэмія» стала часткай вялікай сацыяльнай ініцыятывы кампаніі, якая рэалізуецца ў Беларусі з 2005 года. Кожны год малочны вытворца праводзіць серыю мерапрыемстваў па прасоўванні здаровага ладу жыцця і збалансаванага харчавання, неад'емнай часткай якога выступаюць малочныя прадукты.
Каментары