Узброеныя сілы Германіі, як і раней, недастаткова абсталяваныя, недаўкамплектаваныя персаналам і празмерна забюракратызаваныя. Пра гэта гаворыцца ў новай справаздачы нямецкага парламента, паведамляе Deutsche Welle.
Самай вялікай праблемай, на якую скардзіліся салдаты бундэсвера, быў недахоп абсталявання, нягледзячы на неаднаразовыя абяцанні ўрада пачынаючы з саміта НАТА 2014 года змяніць сітуацыю.
Менш за 50% танкаў, караблёў і самалётаў бундэсвера былі даступныя адначасова для трэніровак ці ў мэтах эксплуатацыі.
«Запасныя часткі па-ранейшаму адсутнічаюць; тэхнічнае абслугоўванне ў прамысловасці зацягваецца, церпяць праграмы навучання. Цалкам неабходна паскарэнне закупак», — гаворыцца ў справаздачы.
Згодна з дакументам, нямецкім салдатам часам даводзіцца спадзявацца на грамадзянскія верталёты, каб перамяшчацца па Афганістане, у той час як жыццёва важнае абсталяванне, такое як бронекамізэлькі, неабходна пазычаць.
У той жа час аўтары адзначаюць, што праблема не абавязкова заключаецца ў недахопе грошай, бо абаронны бюджэт Германіі павялічыўся на 5 млрд еўра, да 43,2 мільярда еўра ў гэтым годзе. «Бундэсвер стаў бюракратычным монстрам. Занадта шмат працы робіцца двойчы», — гаворыцца ў дакуменце.
У справаздачы таксама зафіксаваны рост паведамленняў аб сэксуальных дамаганнях і выпадках правага экстрэмізму сярод салдат.
Яшчэ адной важнай праблемай для Германіі з'яўляецца стагнацыя прызыву на вайсковую службу, якая пачалася пасля таго, як у 2011 годзе краіна адмяніла абавязковую вайсковую службу.
Нягледзячы на тое, што бундэсвер у цэлым пашыраецца (справаздача паказала, што чысты прырост складае 4000 прафесійных вайскоўцаў), большасць з іх з'явілася шляхам падаўжэння існуючых кантрактаў. Іншымі словамі, нямецкія ваенныя старэюць.
Урад абяцаў 198,5 тысяч актыўных служачых да 2025 года ў параўнанні з цяперашнімі 181 тысячай, але колькасць навабранцаў скарацілася з 23 тысяч у 2017 годзе да 20 тысяч у мінулым годзе.
У справаздачы таксама падрабязна распавядаецца пра недахоп ключавых спецыялістаў: не хапае супрацоўнікаў у сферы ваенных інфармацыйных тэхналогій і медыцынскага персаналу.
Каментары