Заявіў міністр замежных спраў Літвы, адказваючы ў Мінску на пытанні журналістаў па выніках перамоў са сваім беларускім калегам Сяргеем Мартынавым і кіраўніком Адміністрацыі прэзідэнта Уладзімірам Макеем.
«Еўрасаюз чакае ад Беларусі крокаў па пабудове адкрытага грамадства, і мы спадзяемся, што такія крокі будуць зробленыя», — заявіў міністр замежных спраў Літвы Вігаўдас Ушацкас,адказваючы 29 снежня ў Мінску на пытанні журналістаў па выніках перамоў са сваім беларускім калегам Сяргеем Мартынавым і кіраўніком Адміністрацыі прэзідэнта Уладзімірам Макеем.
«Мы абмяркоўвалі з міністрам Мартынавым і спадаром Макеем будучыню нашых адносінаў у адзінай Еўропе, — сказаў літоўскі міністр. — Мы зацікаўленыя і вітаем крокі па інтэнсіфікацыі адносінаў Беларусі і Еўрасаюза, а таксама зацікаўленыя ў канструктыўным дыялогу паміж Беларуссю і Літвой».
«Дэмакратызацыя — адна з умоваў Усходняга партнёрства. Мы сочым за крокамі, якія ўжо зроблены беларускім бокам», — сказаў літоўскі міністр. У якасці прыкладу ён назваў рэгістрацыю грамадскага руху «За Свабоду», а таксама вяртанне ў падпісныя каталогі газет «Народная воля» і «Наша Ніва».Паводле яго слоў, Літва вітае крокі, якія робіць беларускі ўрад для таго, каб Беларусь стала ўдзельніцай ініцыятывы «Ўсходняе партнёрства».
У сваю чаргу, С.Мартынаў зазначыў, што Беларусь «займае станоўчую пазіцыю» адносна Ўсходняга партнёрства. «У працэсе яе распрацоўкі яе асноўныя ініцыятары кансультаваліся з Беларуссю, — сказаў С.Мартынаў. — Неабходна дачакацца, пакуль гэтая ініцыятыва будзе прынятая канчаткова. Наша канчатковая ацэнка і магчымасць удзелу ў ёй будзе залежаць ад таго, у якім выглядзе ініцыятыва будзе прынятая».
В.Ушацкас запрасіў С.Мартынава наведаць Літву з афіцыйным візітам ў наступным годзе.
Цяпер чытаюць
Былога міліцыянера асудзілі за жаданне ваяваць у Палку Каліноўскага. Пагражала да 15 гадоў калоніі10
Каментары