Пакуль народ лечыць галаву, беларускі рубель патаннеў на 20% з гакам.
Лукашэнка ведаў што казаў, калі віншаваў электарат з надыходам цяжкога года. Пакуль народ лечыць галаву, беларускі рубель патаннеў на 20,5%. На 2 студзеня Нацбанк усталяваў новыя курсы: долар — 2 650 Br, еўра — 3 703 Br. Ну як, хутка праходзіць хмель?
Такім чынам, чуткі, што МВФ патрабуе дэвальвацыі на 20%, матэрыялізаваліся. Урад не стаў адсякаць хвост за некалькі разоў, а зрабіў ўсё адным махам. Прычым момант выбраны па-свойму ўдала: святочны марафон прытупіць у суграмадзян вастрыню шоку.
Я толькі што размаўляў з абсалютна цвярозым :) эканамістам Яраславам Раманчуком. Радыкальны крок Нацбанка ён патлумачыў тым, што «вельмі ж хочацца атрымаць два з паловай мільярды ад МВФ». На думку эксперта, «калі ўрад не зменіць макраэканамічнай палітыкі, то цягам года давядзецца яшчэ два-тры разы рабіць дэвальвацыю».
Зараз перад урадам стаіць складаная задача не дапусціць уцёкаў грошай з рублёвых дэпазітаў. Імавернасць таго, што ўзровень жыцця беларусаў сёлета ўпадзе — 95%, лічыць Раманчук.
«Наша эканоміка ўваходзіць у фазу рэцэсіі. Паказчыкі «пяцігодкі» выканаць немагчыма. Патрабуецца змена эканамічнага курсу. Мы стаім на пачатку беларускай перабудовы», — рэзюмаваў мой суразмоўца.
Ён не верыць, што цяперашняя каманда здольная да паслядоўных рэформаў, але ж і іншага выйсця няма. Незалежныя эканамісты самі казалі, што дэвальвацыя непазбежная і што ў яе свае плюсы: лягчэй становіцца экспарцёрам, можна выправіць дысбаланс замежнага гандлю і г.д.
Разам з тым, відавочна, што
гэта азначае поўнае фіяска анахранічнай «беларускай мадэлі», якую афіцыйны лідэр інерцыйна расхвальваў у навагоднім звароце, пэўна ж ведаючы ўжо, які падаруначак чакае насельніцтва назаўтра.
Улада ўжо не зможа выконваць у абяцаным аб'ёме той сацыяльны кантракт, які датрымліваўся апошнія гады і за які шараговая маса без асаблівага шкадавання ахвяравала ладным кавалкам правоў ды свабод.
Іншае пытанне, якой будзе рэакцыя. Вельмі імаверна, што беларусы не пабягуць на плошчу, а толькі глыбей урастуць у свае соткі, каб назапасіць бульбы на чорны дзень.
Так ці іначай, расплачвацца за бяздарнасць і рэтраградства ўладаў будзе просты люд.
Цяпер чытаюць
Бабарыка пра сябе ў 2020-м: Гэта не наіўнасць. Не думаю, што такога крыважэрнага сцэнара нехта чакаў35
Каментары