У Маскве абраны шаснаццаты патрыярх Расійскай праваслаўнай царквы.
У Маскве абраны шаснаццаты патрыярх Расійскай праваслаўнай царквы. У храме Хрыста Збаўцы на Памесным саборы яго абіралі больш за 700 дэлегатаў.
Напярэдадні, у нядзелю, Архіярэйскі сабор высунуў тры кандыдатуры. Гэта мітрапаліты: Смаленскі і Калінінградскі Кірыла, Калужскі і Бароўскі Клімент, Мінскі і Слуцкі Філарэт.
У дзень галасавання мітрапаліт Філарэт узяў самаадвод на карысць Кірылы. «Мы павінны быць адзінадушныя, таму я і зняў сваю кандыдатуру. Гэта не знак нейкага негатыву, пратэсту», — сказаў уладыка.
Такім чынам на пасаду патрыярха засталося толькі два кандыдаты — Кірыла і Клімент. Архіяпіскап Полацкі Феадосій прапаноўваў вызначыць новага патрыярха лёсаваннем, але ягоная прапанова была адхіленая.
У выніку таемнага галасавання за Кірылу прагаласавала — 508, за Клімента — 169.
Новы патрыярх (свецкае імя Ўладзімір Гундзяеў) нарадзіўся ў 1946 годзе ў Ленінградзе ў сям’і святара. Па сканчэнні школы паступіў у Ленінградскую духоўную семінарыю, а потым — Акадэмію, якую скончыў у 1970 годзе. Працаваў выкладчыкам дагматычнага багаслоўя ў ЛДАіС, адначасова — асабісты сакратар мітрапаліта Ленінградскага Нікадзіма.
Ад 1971 па 1974 гады — прадстаўнік Маскоўскага патрыярхату пры Сусветнай Радзе Цэркваў у Жэневе. Ад 1974 па 1984 — рэктар ЛДАіС. Ад снежня 1984 — архіяпіскап Смаленскі і Вяземскі. Ад 1988 — архіяпіскап Смаленскі і Калінінградскі. 25 лютага 1991 году ўзведзены ў сан мітрапаліта.
Мітрапаліт Кірыл публічная асоба. Па згадках у СМІ ён нават апярэджваў Аляксія II. Гундзяеў некалькі разоў сустракаўся з папам Рымскім Бенедыктам XVI. За ім замацаваўся неафіцыйны статус «міністра замежных справаў РПЦ».
Каментары