Мазырчук, прыкідваючыся дзяўчынай, выманьваў грошы ў свайго прыяцеля-інваліда
Аднойчы 16-гадовы мазырскі хлопец папрасіў свайго 21-гадовага сябра пазнаёміць яго з дзяўчынай. Той пагадзіўся і сказаў, што праз некалькі дзён у інтэрнэце падлетку напіша Рыта. Праўда, удакладніў — дзяўчына будзе камунікаваць выключна з яго старонкі. Усё скончылася падманам, паведамляе міліцыя.
Дзяўчына аказалася выдуманым персанажам — старэйшы хлопец проста выманьваў грошы ў свайго сябра, хворага на анкалогію.
Ужо ў першым лісце зламыснік папрасіў 20 рублёў на падарунак маці. Далей падобныя сумы патрэбныя былі для паездкі на маршрутным таксі і на куплю лекаў. А аднойчы ён «пазычыў» 150 рублёў на пагашэнне запазычанасці па крэдыце.
«Грошы для Рыты» падлетак здымаў у банкамаце і перадаваў іх у рукі сябру, а той іх марнаваў на прадукты харчавання і цыгарэты.
Хлопец неаднаразова прасіў віртуальную знаёмую даслаць яму свае фатаграфіі, альбо папросту патэлефанаваць. Аднак «знаёмая» адмаўлялася. Суразмоўцы нават дамаўляліся пра спатканне ў горадзе, аднак у апошні момант усё зрывалася.
Падман выявіўся выпадкова, калі маці хлопчыка не далічылася грошай на банкаўскай карце. Ён расказаў ёй пра ўсё, пасля чаго паступіла заява ў міліцыю.
Завялі крымінальную справу па ч.1 арт.209 КК Беларусі (махлярства).
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5959
Каментары