«Магчыма памілаванне». Дзяржава абяцае індывідуальны падыход да кожнага асуджанага за наркотыкі
Дзяржава разглядае магчымасць даць другі шанец тым, хто ўпершыню быў асуджаны за наркотыкі, — прыярытэтам стане індывідуальны падыход да кожнага, хто сядзіць па «наркатычным артыкуле». Такая інфармацыя прагучала ў эфіры тэлеканала «Беларусь 1», паведамляе Tut.by.
«Зыходзячы з прынцыпу справядлівасці, прэзідэнт даручыў паглядзець, хто знаходзіцца ў месцах пазбаўлення волі. Магчыма, людзі ўжо ўсвядомілі, зразумелі, што яны спатыкнуліся, памыліліся. Калі яны сталі на шлях выпраўлення, магчыма і ўмоўна-датэрміновае вызваленне, але пры пэўных умовах: калі гэтыя людзі сапраўды стануць на шлях выпраўлення, возьмуць на сябе абавязацельства ўладкавацца на працу альбо паступіць на вучобу», — распавёў намеснік кіраўніка Адміністрацыі прэзідэнта Валерый Міцкевіч.
Ён таксама дадаў, што калі гэта людзі выпадкова спатыкнуліся, то будзе магчымасць «падрыхтаваць для іх да памілавання».
Міцкевіч падкрэсліў, што кожная справа будзе разглядацца індывідуальна. Пры гэтым будуць улічвацца абставіны здарэння, асоба асуджанага, яго паводзіны. Адным з крытэраў стане гатоўнасць сваякоў ўзяць на сябе адказнасць за гэтых людзей.
«Калі яны не скарыстаюцца прадастаўленым ім шанцам і зноў возьмуцца за сваё, то, вядома, адказнасць будзе вельмі суровая», — падкрэсліў Міцкевіч.
Занепакоенасць лёсам асуджаных за наркотыкі беларускіх падлеткаў выказала на днях эксперт ААН па правах чалавека ў Беларусі Анаіс Марын. Яна заклікала беларускія ўлады прывесці Крымінальны кодэкс у адпаведнасць з уласнымі абавязальніцтвамі ў рамках Канвенцыі аб правах дзіцяці і перагледзець заканадаўства ў галіне наркотыкаў і сістэму ювенальнай юстыцыі, у першую чаргу з тым, каб знайсці альтэрнатывы турэмнага зняволення.
«Арышт, затрыманне дзяцей і падлеткаў або іх заключэнне пад варту павінна быць меншай мерай, і перыяд пазбаўлення волі павінен быць максімальна кароткім», — заявіла спецдакладчык.
Цяпер чытаюць
Вайб-праграмаванне зменіць ролю распрацоўшчыка, RLVR і калі лопне бурбалка. Беларус-інжынер у галіне ШІ, які працуе ў ЗША, расказаў, што нас чакае ў 2026
Каментары