Лукашэнка ўзгадніў новых намеснікаў у міністэрства прамысловасці, юстыцыі і прыродных рэсурсаў
Аляксандр Лукашэнка ўзгадніў сёння прызначэнні новых намеснікаў міністраў прамысловасці, юстыцыі, прыродных рэсурсаў і аховы навакольнага асяроддзя, паведамляе БЕЛТА.
На пасаду намесніка міністра юстыцыі ўзгоднена Наталля Філіпава, цяпер у міністэрстве яна начальнік галоўнага ўпраўлення абавязковай юрыдычнай экспертызы нарматыўных прававых актаў.
Дэпутат Палаты прадстаўнікоў шостага склікання Баляслаў Пірштук узгоднены на вакантную пасаду першага намесніка міністра прыродных рэсурсаў і аховы навакольнага асяроддзя. Намеснік міністра прамысловасці Сяргей Гунько пойдзе на павышэнне і стане там першым намеснікам.
Кіраўнік дзяржавы таксама ўзгадніў прызначэнне Аксаны Цылько старшынёй Камітэта дзяржаўнага кантролю Брэсцкай вобласці. Пакуль яна намеснік начальніка галоўнага аналітычнага ўпраўлення — начальнік упраўлення аналізу і планавання КДК Беларусі.
Таксама Лукашэнка ўзгадніў прызначэнне Анатоля Бубена на пасаду старшыні Беларускага дзяржаўнага канцэрна харчовай прамысловасці «Белдзяржхарчпрам».
Кіраўнік дзяржавы таксама даў згоду на прызначэнне новага генеральнага дырэктара ААТ «Мінск-Крышталь» — кіруючая кампанія холдынгу «Мінск Крышталь Груп». Арганізацыю ўзначаліць Ігар Шустаў, які да цяперашняга часу працаваў першым намеснікам старшыні канцэрна «Белдзяржхарчпрам».
Каментары