Ці трэба насіць маску? Краіны Азіі рэкамендуюць, Еўропа і СААЗ — не
Часцей мыйце рукі, трымайце дыстанцыю паўтара метра, па магчымасці не ездзіце ў грамадскім транспарце… Сярод рэкамендацый Сусветнай арганізацыі аховы здароўя на перыяд пандэміі каранавіруса няма пункта пра маску.
Не рэкамендуюць нашэнне маскі і некаторыя еўрапейскія краіны.
У той жа час у Аўстрыі і Украіне без маскі цябе больш не пусцяць у краму.
Калі віцэ-прэзідэнт кітайскага Чырвонага Крыжа Янь Хуічуан прыехаў у Італію кансультаваць улады па барацьбе з каранавірусам, ён абурыўся: «Грамадскі транспарт тут працягвае хадзіць, на вуліцах — мора людзей. І нават у найбольш уражаных каранавірусам зонах людзі не носяць маскі».
Сапраўды, нашэнне маскі стала адным з галоўных пунктаў у правілах татальнай вайны супраць COVID-19 у Кітаі і Паўднёвай Карэі. Кітайцы строга трымаюцца гэтага правіла, нават калі трапляцюь за мяжу. Кітайскія студэнты не выходзяць на вуліцы Мінска без маскі, ад лютага пачынаючы. Спачатку яны былі аднымі такімі ў беларускай сталіцы, аднак у апошнія дні колькасць людзей у масках рэзка вырасла.
У Кітаі адсутнасць рэкамендацый насіць маскі ў заходніх краінах звязваюць проста з іх дэфіцытам. Сістэмы аховы здароўя такім чынам хочуць ашчадзіць запас масак для медыкаў, бо ў многіх заходніх краінах, у тым ліку ЗША, Францыі, Італіі, назіраецца іх крытычны дэфіцыт нават ва ўстановах аховы здароўя.
На мінулым тыдні Сусветная арганізацыя аховы нагадала, што вірус не застаецца ў паветры, і «ўдыхнуць» яго можна толькі ў бальніцы і пры кантакце з хворым, калі ён кашляе і дыхае на вас. Калі вы трымаеце бяспечную дыстанцыю і мыеце рукі, вы можаце не заганяцца, сцвярджаюць заходнія медыкі.
У той жа час генеральны дырэктар Кітайскага цэнтра кантролю і прафілактыкі хвароб інтэрв'ю часопісу Science Джордж Гао заклікаў людзей масава насіць маскі, каб спыніць распаўсюд віруса.
«Вялікая памылка ЗША і Еўропы, на маю думку, што людзі не носяць масак, — сказаў Гао. — Многія людзі могуць быць бессімптомнымі ці прэсімптомнымі носьбітамі інфекцыі. Калі б яны насілі маскі, кропелькі з вірусам не разляталіся б вакол іх і вірус не заражаў бы іншых».
Што можна сказаць з улікам такіх супярэчлівых думак? Напэўна, варта ўзяць за правіла надзяваць маску, калі едзеш у загружаным транспарце і ідзеш у людную краму, а тым больш — у бальніцу. У той жа час няма патрэбы ў масцы, калі ты гуляеш на дварэ.
Каментары