Мінздароўя: Захворванне на каранавірус павінна зніжацца ў наступныя 3-4 тыдні
Пра гэта заявіла намеснік міністра — галоўны дзяржаўны санітарны доктар Беларусі Наталля Жукава ў інтэрв'ю праграме «Контуры» на тэлеканале АНТ, паведамляе БЕЛТА.
«На працягу 2-3 тыдняў сітуацыя не скончыцца, мы будзем у эпідпрацэсу. Але хацела б адзначыць, што сітуацыя кіраваная. Ёсць перадумовы меркаваць, што захворванне павінна зніжацца ў найбліжэйшыя 3-4 тыдні», — адзначыла Наталля Жукава.
Яна патлумачыла, што Міністэрства аховы здароўя адсочвае захворванне рэспіраторнымі інфекцыямі, таму можа зрабіць такую выснову. «Зніжэнне захворвання на рэспіраторныя інфекцыі па ўсіх рэгіёнах Беларусі дае нам падставы меркаваць, што і захворванне на каранавірусную інфекцыю праз некалькі тыдняў стабілізуецца ці пачне зніжацца», — удакладніла намеснік міністра.
Паводле яе слоў, праводзіцца вялікая праца па лакалізацыі ачагоў COVID-19. «Кожны выпадак каранавіруснай інфекцыі разглядаецца як ачаг, і ў абавязковым парадку вядзецца пошук кантактаў. Такім чынам, мы перарываем ланцужок распаўсюджвання віруса. Гэта абавязковая ўмова для стрымлівання эпідпрацэсу», — падкрэсліла яна.
Ад суботы Мінздароўя перастала называць агульную лічбу хворых на каранавірус з пачатку ўспышкі.
У пятніцу была лічба 4779 выпадкаў, а ў суботу і нядзелю называлася колькасць тых, хто лечыцца стацыянарна — 3282 і 3586 адпаведна.
Каментары