У Брэсце праціўнікі акумулятарнага завода дэманстратыўна сышлі з сустрэчы з чыноўнікамі
Берасьцейская міліцыя 19 ліпеня чарговы раз не дазволіла праціўнікам будаўніцтва акумулятарнага завода сабрацца на плошчы Леніна ў цэнтры горада, піша радыё «Свабода».
Каля 12 гадзін праціўнікі завода пачалі прыходзіць на плошчу на традыцыйную сустрэчу. Яны зьбіраліся там кожную нядзелю з 25 лютага 2018 году. Аднак ужо пятую нядзелю запар міліцыя не дазволіла актывістам сабрацца. Пад пагрозай затрыманьня іх змушалі сыходзіць з плошчы, прапаноўваючы прайсьці ў Берасьцейскі гарвыканкам, паведаміў праваабаронца Раман Кісьляк.
На сустрэчу з людзьмі ў Берасьцейскі гарвыканкам прыйшлі адзін з новых уласьнікаў акумулятарнага завода Дзьмітры Баскаў, а таксама галоўны інжынэр ААТ «НПФ «Экалёгія» Дзьмітры Гурыкаў. Гэтая фірма праводзіла карэкціроўку праектнай дакумэнтацыі завода, калі той яшчэ належаў ТАА «АйПаўэр». Мадэратарам сустрэчы быў старшыня Берасьцейскага гарвыканкама Аляксандар Рагачук.
Праз 15 хвілін пасьля пачатку сустрэчы большая частка актывістаў пакінула залю, скандуючы «Не заводу!». Гэта адбылося пасьля таго, як адзін зь лідэраў грамадзкай кампаніі супраць акумулятарнага завода Дзьмітры Бекалюк заявіў, што такія сустрэчы павінны мець юрыдычнае значэньне, інакш гэта проста пустыя размовы. Ён прапанаваў абвясьціць правядзеньне грамадзкіх абмеркаваньняў новай ацэнкі ўзьдзеяньня на навакольнае асяродзьдзе прадпрыемства, Баскаў гэтую прапанову не падтрымаў.
Аляксандар Лукашэнка 22 чэрвеня падчас сустрэчы з грамадзкасьцю Берасьця, на якой прысутнічалі і праціўнікі прадпрыемства, паабяцаў правесьці рэфэрэндум пра лёс завода. Яго плянуецца арганізаваць пасьля прэзыдэнцкіх выбараў 9 жніўня.
Цяпер чытаюць
Лукашэнка заклікаў жыхароў Гомельшчыны не хвалявацца з-за ўльтыматуму Зяленскага адносна рэтранслятараў36
Каментары