Іран адмаўляе, што пагадзіўся дапусціць інспектараў да ядзерных аб’ектаў.
ЗША прыпынілі на 60 дзён дзеянне санкцый, якія на працягу дзесяткаў гадоў забаранялі гандаль нафтай і нафтапрадуктамі з Ірана за даляры, піша Бі-бі-сі.
Міністэрства фінансаў ЗША выдала ліцэнзію, якая да 21 жніўня дазваляе банкаўскае абслугоўванне і страхаванне вытворчасці, транспартавання і гандлю іранскай нафтай і нафтахімічнай прадукцыяй за даляры. Гэта азначае, што Ірану для гэтых мэтаў больш не спатрэбіцца выбудаваны ім складаны ланцужок пасярэднікаў. Ад гэтага часу нафту можна будзе ўвозіць нават наўпрост з Ірана ў ЗША.
У амерыкана-іранскім мемарандуме аб узаемаразуменні, падпісаным 17 жніўня, утрымліваецца абавязацельства ЗША зняць «усе віды санкцый», уведзеных супраць Ірана.
Санкцыі супраць Ірана ўводзіліся на працягу многіх гадоў — як з боку ЗША, так і на шматбаковым узроўні: Радай бяспекі ААН і Міжнародным агенцтвам па атамнай энергіі (МАГАТЭ). ЗША абавязаліся дамагчыся адмены і міжнародных санкцый таксама.
Прыпыняючы дзеянне сваіх санкцый, адміністрацыя Трампа зрабіла першы крок да выканання гэтага абавязацельства. У тым жа мемарандуме аб узаемаразуменні пункт 10 гаворыць, што да канчатковай адмены санкцый Мінфін ЗША абавязваецца выдаць часовыя ліцэнзіі на абслугоўванне іранскага нафтавага сектара.
У заяве міністра фінансаў ЗША Скота Бесэнта гаворыцца, што са свайго боку Іран абавязаўся на працягу гэтых жа 60 дзён не перакрываць Армузскі праліў і дапусціць інспектараў МАГАТЭ.
Таксама ў панядзелак віцэ-прэзідэнт Джэй Дзі Вэнс заявіў журналістам, што абмеркаванні пра вяртанне ў Іран інспектараў МАГАТЭ «могуць пачацца ўжо сёння», а сам працэс «як мінімум пачнецца на гэтым тыдні».
Аднак Іран гэта адмаўляе. МЗС краіны заявіла дзяржаўнаму агенцтву IRNA, што ніякіх новых абавязацельстваў на перамовах з ЗША, якія прайшлі ў нядзелю з удзелам Вэнса, Іран не браў. У мемарандуме аб узаемаразуменні ўсё, што датычыцца іранскай ядзернай праграмы, называецца прадметам выніковай здзелкі, якую яшчэ трэба будзе заключыць. Узаемадзеянне з інспектарамі МАГАТЭ будзе адбывацца «ў рамках існуючых працэдур, устаноўленых парламентам і Вышэйшай радай нацыянальнай бяспекі», заявіў прадстаўнік іранскага МЗС Эсмаіл Багай.
МАГАТЭ пакуль не каментавала гэтае пытанне.
Іран прыпыніў доступ інспектараў арганізацыі да аб’ектаў, якія былі падвергнутыя бамбардзіроўкам ЗША і Ізраіля ў ходзе 12‑дзённай вайны мінулым летам. На працягу месяца пасля гэтага ўсе інспектары пакінулі краіну.
Прапаганда рыхтуе грамадства да загадкавай «працяглай камандзіроўкі» Лукашэнкі39
Каментары
США перестают быть сверхдержавой.
В глобальном выйгрыше Китай, Москве,э уже, ничего не поможет, она - сырьевой придаток Китая.