Пасля ўдару ад невядомага трэнер па бодзібілдынгу трапіў у кому. Блізкія дапускаюць палітычны канфлікт
Канфлікт вядомага мінскага фітнес-трэнера Антона Качанава з незнаёмым мужчынам у краме прывёў да двухтыднёвай комы.
Інцыдэнт адбыўся ў ноч на 19 снежня. У краме адбылася спрэчка з невядомым мужчынам, які ўдарыў Антона на выхадзе. Траўматычнае падзенне і ўдар галавой прывялі да комы.
«У Антона пералом зводу чэрапа, была цяжкая аперацыя з выдаленнем гематом, аперыраваў вядомы нейрахірург Дзмітрый Вееўнік», — расказала «Нашай Ніве» нявеста Антона, Святлана.
«Ні я, ні мама Антона два дні не ведалі аб тым, што адбылося. У БХМД ён два дні ляжаў як «невядомы». Таго, хто біў, ужо затрымалі, праводзяцца следчыя дзеянні. Мама Антона была ў следчай, і там прагучала слова «патрыёт» у дачыненні да злачынцы. Я баюся памыліцца, але па гэтым слове можна дапусціць, што канфлікт мог адбыцца па палітычных прычынах», — дадае Святлана.
Сапраўды, Антон Качанаў сваю пазіцыю выяўляў адкрыта — у «шапцы» 50-тысячнага інстаграма ён паставіў нацыянальныя бела-чырвона-белыя колеры, змяшчаў жалобныя допісы пра Рамана Бандарэнку.
Цяпер блізкія чакаюць, пакуль Антон вернецца ў прытомнасць і сам раскажа аб падзеях таго вечара.
«31 снежня яго адключылі ад медыкаментознай комы, у якой ён быў два тыдні. Сёння раніцай я была ў яго — цяпер Антон троху расплюшчвае вочы, спрабуе варушыць рукамі-нагамі, ледзь-ледзь. Дактары кажуць, што ён цяпер нічога не разумее, але стан стабільны. Цяжкі, але стабільны: тэмпература нармальная, ціск. Усе чакаюць, пакуль ён адыдзе ад седатыўных сродкаў, каб зноў правесці даследаванне і вызначыць ступень пашкоджанняў. Магчыма, Антон цалкам адновіцца, пакуль невядома», — сказала Святлана.
«Наша Ніва» звярнулася з запытам у Следчы камітэт, просім апублікаваць словы падазраванага аб яго матывах.
Цяпер чытаюць
22‑гадовы Віктар з-пад Клецка пратрымаўся на фронце месяц. А пасля бацькі перасварыліся, дзелячы грабавыя16
Каментары