«Мы засакрэчаныя». У Гродне ў судзе амапаўцы замест сваіх адрасоў называлі звесткі актывістаў
У Гродне працягваецца разгляд крымінальнай справы ў дачыненні да пяці гродзенцаў, якія абвінавачваюцца па артыкуле 342 КК РБ «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх», а таксама ў гвалце над сілавікамі. Пацярпелыя — 11 супрацоўнікаў міліцыі. У панядзелак, 15 лютага, дапытвалі трох з іх. Пры гэтым амапаўцы на судзе замест свайго адрасу пражывання чамусьці называлі адрасы гродзенскіх актывістаў, піша Tut.by.
Справа разглядаецца ў судзе Ленінскага раёна Гродна. З пяці абвінавачаных на лаве падсудных засталося чатыры чалавекі — браты Уладзімір і Юрый Сідзянеўскія, сёстры Жанна Захарэвіч і Надзея Сцяпанцава.
Аляксандр Якубоўскі знік — цяпер абвешчаны ў вышук.
Справа тычыцца акцыі пратэсту, якая праходзіла 6 верасня. Тады гарадзенцы выйшлі на вуліцу ў некалькіх месцах. Былі сутычкі з АМАПам на вуліцы Гарнавых і каля ўніверсама «Брэст». Па гэтых эпізодах і абвінавачваюцца пяць чалавек.
У панядзелак дапытвалі пацярпелых супрацоўнікаў АМАПа. Першым выступаў «Віктар Дмухоўскі». Сваім хатнім адрасам ён назваў месца прапіскі гродзенскага актывіста Эдуарда Дмухоўскага. На пытанне, чаму ў афіцыйных дакументах ён указвае гэтыя звесткі, амапавец адказаў, што прыйшло ў галаву — і назваў».
Падчас дачы паказанняў супрацоўнік знаходзіўся за дзвярыма. Распавядаў, што людзі 6 верасня на вуліцы Гарнавых выкрыквалі антыўрадавыя лозунгі, потым сталі ў счэпку, штурхаліся і спрабавалі сарваць з сілавікоў маскі. Асабіста ён затрымаў трох ці чатырох чалавек. Аднак тое, што менавіта адна з абвінавачаных зрывала з яго балаклаву, ён дакладна сказаць не змог. Другую абвінавачваную ён не памятае. На яго твары засталася драпіна, была парваная балаклава. У бальніцу ён не звяртаўся, на бальнічным не быў.
Таксама выслухалі яшчэ двух пацярпелых амапаўцаў. Іх імёны зменены: гэта «Базылевіч» і «Мянько».
Пры гэтым «Юрыя Базылевіча «на вуліцы Гарнавых не было, ён знаходзіўся каля ўніверсама «Брэст». Там таксама «людзі стаялі ў счэпцы, ішлі на супрацоўнікаў, распылялі газ». Ён нікога не затрымліваў у той дзень. У якасці свайго адрасу ён назваў адрас гродзенскага актывіста Ежы Грыгенчы. На пытанне, чаму менавіта гэтыя даныя, адказаў: «Гэта сакрэтная інфармацыя, мы засакрэчаныя».
Далей дапытвалі амапаўца «Ігара Мянько». Якія непасрэдна незаконныя дзеянні здзяйснялі абвінавачаныя, ён патлумачыць не змог.
У працэсе ўжо дапытаныя ўсе пацярпелыя і сведкі. На наступным пасяджэнні плануюць глядзець відэаматэрыялы справы.
Каментары