Вялікі тэатр оперы і балета Беларусі рыхтуе пастаноўку оперы «Дзікае паляванне караля Стаха». Прэм’ера запланавана на 11 і 12 ліпеня. Пра гэта паведаміў мастацкі кіраўнік тэатр Валянцін Елізар’еў на прэс-канферэнцыі, піша БелТА.
«Мы чакаем гэтую прэм’еру, праца над якой была даручана рэжысёру-пастаноўшчыку Ганне Маторнай, дырыжору-пастаноўшчыку Андрэю Іванову, хормайстру народнай артыстцы Беларусі Ніне Ламановіч», — сказаў Валянцін Елізар’еў.
Спектакль «Дзікае паляванне караля Стаха» паводле гістарычнага дэтэктыва Уладзіміра Караткевіча ўжо стаў нацыянальнай музычнай класікай. Ён быў створаны ў 1989 годзе кампазітарам Уладзімірам Солтанам.
Спектакль выклікаў фурор сярод публікі і крытыкаў, стаўшы сапраўднай сенсацыяй у тэатральным жыцці краіны.
Як адзначыла Ганна Маторная, поспех першай пастаноўкі складана перасягнуць, але творчы калектыў і не ставіць перад сабой такую задачу. «На мой погляд, «Дзікае паляванне караля Стаха» — знамянальны для тэатра матэрыял, дзе ёсць усё: гісторыя, каханне, атмасфера, — сказала яна. — Разам з пастановачнай групай мы ствараем нацыянальны спектакль і хочам, каб у ім была адлюстравана Беларусь: менталітэт і нацыянальны характар, няўлоўная містыка, якую прапісаў Караткевіч.
Я не ведаю, што атрымаецца ў канцы, але мы будзем рабіць усё магчымае, каб краіна магла ганарыцца, што ў нас ёсць такая опера».
У тэатры распавялі: мастаком-пастаноўшчыкам стаў Андрэй Меранкоў. У афармленні сцэны будуць выкарыстоўвацца колеры і матывы слуцкіх паясоў.
Публіка ўбачыць ажыўшыя старадаўнія замкі, іх унутранае ўбранне з бібліятэкай, камінам, падвеснымі сталамі. Паўстануць і злавесныя балоты, пусткі, занесеныя снегам. Адзін з сюрпрызаў спектакля — жывы конь. Вялікае значэнне аддаецца сімвалам, якія глядач напэўна прачытае: гадзіннік як ідэя збягаючага часу, шахматы як лейтматыў вечнай гульні, у якую ва ўсе стагоддзі ўцягнутыя людзі.
Каментары