Адносіны з краінамі Еўропы ў штопары. Беларусь высылае пасла Латвіі і ўсіх супрацоўнікаў амбасады, акрамя аднаго
Амбасадар Латвіі быў запрошаны ў Міністэрства замежных спраў Беларусі ў сувязі з «абразай дзяржаўнага сцяга Беларусі» ў Рызе. Пра гэта заявіў журналістам міністр замежных спраў Беларусі Уладзімір Макей.
Рэакцыю Мінска выклікала сітуацыя ў Рызе, дзе сёння мэр горада замяніў у шэрагу сцягоў краін-удзельніц Чэмпіянату свету дзяржаўны чырвона-зялёны сцяг на беларускі нацыянальны бел-чырвона-белы.
Вострую рэакцыю Мінска маглі выклікаць таксама словы, якія мэр Рыгі напісаў у сваім твітары: «Сцяг, які сімвалізуе рэжым, які ажыццяўляе дзяржаўны тэрарызм, недарэчны ў гарадскім асяроддзі Рыгі — таму мы яго знялі!»
Чытайце таксама: У Рызе падчас правядзення ЧС па хакеі замянілі дзяржаўны сцяг на нацыянальны бел-чырвона-белы
Паслу Латвіі прапанавана пакінуць Беларусь на працягу сутак.
«Амбасадару прапанавана пакінуць Беларусь на працягу 24 гадзін. Усяму дыпламатычнаму і адміністрацыйна-тэхнічнаму складу пасольства таксама прапанавана пакінуць Беларусь — на працягу 48 гадзін. Пакінуць тут аднаго адміністрацыйна-тэхнічнага супрацоўніка для догляду за будынкам», — сказаў міністр.
Таксама Макей адзначыў, што краіна «гатовая да сіметрычнага адказу Латвіі на ад'езд дыпламатаў».
Яшчэ нядаўна Латвія мела адны з найлепшых адносін з Мінскам у ЕС і лічылася лабістам мяккага стаўлення да Аляксандра Лукашэнкі. Гэта звязвалі як з бізнэс-інтарэсамі латвійскіх кампаній, так і з жаданнем забяспечыць нейтральнасць Мінска ў няпростых адносінах Рыгі і Масквы. Латвія і Беларусь нават разам атрымалі права на правядзенне Чэмпіянату свету па хакеі. Аднак адносіны сапсаваліся пасля падзей 2020 года ў Беларусі. Латвія далучылася да асуджэння парушэння правоў чалавека ў нашай краіне і падтрымала ініцыятыву аб пераносе чэмпіянату з Мінска.
Цяпер жа, пасля пасадкі ў Мінску самалёта «Раянэйра», адносіны Беларусі з усімі суседзямі, акрамя Расіі, увайшлі ў штопар.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім1414
Каментары