У Мінску адмянілі сустрэчу з лідарам духоўнага фонду, які параўноўваюць з сектай — а планавалі сабраць «Чыжоўка-Арэну»
Вы наўрад ці ведаеце, хто такі Шры Шры Раві Шанкар, але фонд пад кіраўніцтвам гэтага чалавека звязаны з сотнямі мільёнаў людзей ва ўсім свеце. Шанкар збіраўся наведаць і Беларусь — візіт скасавалі за тыдзень да пачатку.
У Шры Шры Раві Шанкара складаная рэпутацыя. 70‑гадовы гуру з Індыі вядомы праз сваю арганізацыю The Art of Living: паводле самой арганізацыі, яны «закранулі жыццё больш як 370 мільёнаў чалавек», а адных інструктараў у іх больш за 38 тысяч. The Art of Living публічна вядомыя як арганізатары курсаў ёгі і медытацыі, таксама на сайце арганізацыі прапануюць шматступенчатую сістэму падрыхтоўкі адэптаў — вядома, не за бясплатна.
Ёсць за імі, аднак, і скандалы. Напрыклад, у 2011‑м арганізацыя падала ў амерыканскі суд на двух былых адэптаў, якія заснавалі крытычныя блогі пра яе. The Art of Living часта абвінавачваюць у сектанцтве і кульце асобы стваральніка, прычым палеміка вакол арганізацыі далятала і да нашага рэгіёна: у 2020‑м літоўскі Delfi пісаў пра дзіўныя практыкі The Art of Living.
Арганізацыя мае і беларускае аддзяленне. 28 кастрычніка ў Беларусь мусіў прыехаць сам Шры Шры Раві Шанкар, а 29‑га гуру планаваў сабраць на сустрэчы з сабой ажно «Чыжоўка-Арэну». Арэна можа змясціць 8800 гледачоў.
Гэта мусіў быць першы візіт Шанкара ў Беларусь, пры гэтым гуру не раз наведваў Расію і праводзіў там лекцыі. У чэрвені 2026‑га Шанкар быў на Пецярбургскім міжнародным эканамічным форуме, дзе сустрэўся з прадстаўнікамі Беларускага фонду міру — тады яго і запрасілі ў Беларусь.
21 кастрычніка стала вядома, што сустрэчы ў «Чыжоўка-Арэне» не будзе: тым, хто паспеў набыць квіткі, прапанавалі іх вяртаць. З сайта Шры Шры Раві Шанкара знікла інфармацыя і пра сам візіт у нашу краіну.
Беларускае прадстаўніцтва The Art of Living пацвярджае, што візіту не будзе, але не тлумачыць адмену: маўляў, прычыны пакуль што высвятляюцца. Не было ніякіх абвестак пра скасаванне і ў сацсетках Шанкара. Пра тое, ці чакаць новага прыезду гуру, у беларускім прадстаўніцтве арганізацыі не кажуць і раяць замест гэтага прыехаць у Мюнхен — Шанкар выступае там 31 кастрычніка.
«Наша Нiва» — бастыён беларушчыны
ПАДТРЫМАЦЬЦяпер чытаюць
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос8
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1414
Каментары