Сенат Чэхіі прызнаў злачынствы расійскай арміі ва Украіне генацыдам украінскага народа
Пра прынятае чэшскім Сенатам рашэнне паведаміў у Twitter амбасадар Украіны ў Празе Яўген Перабійніс.
Амбасадар, у прыватнасці, напісаў:
«Чэшскі Сенат прызнаў злачынствы, якія расійская армія здзяйсняе ва Украіне, генацыдам украінскага народа. У прынятай пастанове таксама ўтрымліваецца падтрымка далейшага надання Чэхіяй Украіне зброі і атрымання Украінай статусу кандыдата на сяброўства ў Еўрасаюз».
Чэшскія сенатары заявілі, што Расія ва Украіне груба парушае міжнароднае гуманітарнае права і міжнародныя канвенцыі. Сенат асудзіў шматлікія ваенныя злачынствы, учыненыя Расіяй ва ўкраінскіх гарадах, такіх як Буча, Барадзянка, Ірпень і Марыупаль, якія сведчаць пра тэрор супраць насельніцтва, масавыя пакаранні і дэпартацыі сотняў тысяч чалавек.
Сенат асудзіў этнічна матываваныя злачынствы супраць чалавецтва, якія Расія здзяйсняе сістэмна і маштабна, заяўляючы, што яны з'яўляюцца праявамі генацыду супраць украінскага народа.
Сенат Чэхіі — не першы парламент, які прыняў падобнае рашэнне. Да гэтага заявы аб прызнанні дзеянняў Расіі ва Украіне генацыдам прынялі парламенты Канады і трох краін Балтыі — Літвы, Латвіі і Эстоніі.
Каментары