УСУ пачалі наступальныя дзеянні па шматлікіх напрамках на поўдні Украіны

Прадстаўнікі аператыўнай групоўкі войскаў «Кахоўка» апублікавалі на сваёй старонцы ў фэйсбуку відэа на якім меркавана расейскі вайсковец кажа, што ўкраінскія войскі 29 жніўня «прарвалі першую лінію абароны і «***» [наносяць удары] з усяго, што толькі можна, з танкаў, авіяцыі, артылерыі».

Прадстаўнікі «Кахоўкі» сцвярджаюць, што падчас баёў 109 полк самаабвешчанай ДНР адышоў са сваіх пазіцый — як і расейскія дэсантнікі, якія забяспечвалі падтрымку падраздзяленням ДНР.

Выданне «Громадське» паведаміла, што інфармацыю аб прарыве і адыходзе 109 палка пацвердзілі тры іх крыніцы ў падраздзяленнях УСУ на поўдні.

Пра тое, што УСУ пачалі наступальныя дзеянні па многіх напрамках на поўдні Украіны, таксама сказала «Громадське» кіраўнік прэс-службы камандавання «поўдзень» Наталля Гумянюк.

У аператыўнай групоўцы «Кахоўка», таксама заявілі, што ракетамі сістэмы залпавага агню HIMARS знішчаныя практычна ўсе вялікія масты праз Дняпро ў акупаванай расійскай арміяй Херсонскай вобласці. Гаворка пра Антонаўскі чыгуначны і аўтамабільныы масты, а таксама пра Новакахоўскі. «Кахоўка» сцвярджае, што засталіся толькі пешаходныя пераходы, а расійская армія апынулася адрэзанай ад паставак узбраення і асабістага складу з тэрыторыі Крыму. «Для Украіны гэта бліскучы шанец вяртаць свае тэрыторыі», — гаворыцца ў іх паведамленні.

Раней з’явілася інфармацыя, што аб’яднаная групоўка «Кахоўка» прарвала першую лінію абароны расіян на Херсоншчыне.

У Новай Кахоўцы абвешчана масавая эвакуацыя.

Паведамляць на контрнаступ украінцаў пачалі і заходнія медыя. 

Амерыканскі журналіст CNN Джым Шута ў сваім твітары напісаў, што два высокапастаўленыя амерыканскія чыноўнікі паведамілі яму пра ўкраінскія аперацыі на поўдні Украіны, якія падрыхтуюць умовы для ўкраінскага контрнаступу. ЗША мяркуюць, што контрнаступ будзе як паветраным, так і наземным.

Падобныя аперацыі з’яўляюцца стандартнай практыкай перад контрнаступам і ўключаюць нанясенне удараў па сістэмах ўзбраення, камандаванню і кіраванню, складах боепрыпасаў і іншых цэлях. 

Са слоў высокапастаўленага амерыканскага чыноўніка, гэта стала магчымым дзякуючы таму, што Расія не змагла разгарнуць на перадавой дастатковую колькасць падраздзяленняў. 

Чыноўнік сказаў, што многія з існуючых расійскіх падраздзяленняў, якія Расія арганізуе ў баявыя тактычныя групы, разгорнутыя ў няпоўным складзе, некаторыя нават у два разы меншыя ад іх звычайнай колькасці.

• 107
• 0
• 4
• 3
• 2
• 7
• 2
• 0