3 кастрычніка ў МЗС Літвы быў выкліканы прадстаўнік амбасады Расіі ў Літве. Яму ўручылі ноту аб прызнанні часовага паверанага ў справах Расіі Сяргея Рабаконя персонай нон грата. Рабаконь павінен пакінуць краіну на працягу 5 дзён.
Прычыны гэтага не патлумачаныя.
Напярэдадні МЗС Літвы выпусціла заяву ў сувязі з незаконнай анексіяй Расіяй Данецкай, Херсонскай, Луганскай і Запарожскай абласцей Украіны.
Там гаворыцца, што Літва і міжнародная супольнасць не прызнаюць псеўдарэферэндумы ў Данецкай, Луганскай, Херсонскай і Запарожскай абласцях Украіны, фальсіфікаваныя вынікі якіх паслужылі падставай для анексіі з боку Расіі, ніякім чынам не адлюстроўвалі волю ўкраінскага народа, якія рашуча супраціўляюцца расійскай акупацыі.
Літва заклікала міжнародную супольнасць узмацніць санкцыі супраць Расіі, а таксама прыцягнуць да адказнасці тых, хто актыўна ўдзельнічаў у гэтых незаконных дзеяннях.
«Мы патрабуем, каб Расія неадкладна спыніла сваю агрэсію ва Украіне і вывела свае ўзброеныя сілы з усёй тэрыторыі Украіны. Разам з нашымі партнёрамі мы будзем і далей усімі сіламі падтрымліваць Украіну і яе народ у барацьбе за іх свабоду і дэмакратычную будучыню краіны», — гаворыцца ў заяве.
У расійскім МЗС заявілі, што РФ адкажа на высылку Літвой часовага паверанага ў справах Расіі.
Каментары