Праз вайну ў Светлагорску закрылася прадпрыемства, якое называлі эканамічным цудам рэгіёну. Яго маёмасць распрададуць за даўгі
Маёмасць Светлагорскага прадпрыемства, якое яшчэ нядаўна называлі «эканамічным цудам» рэгіёну, збіраюцца распрадаваць за даўгі. Светлагорскі завод зварачных электродаў не працуе ўжо больш за паўгода і павінен вярнуць банку «Дабрабыт» амаль 6,2 млн рублёў, паведамляе выданне «Ранак».
Эканамічны суд Гомельскай вобласці на мінулым тыдні прыняў рашэнне спагнаць з ТАА «Светлагорскі завод зварачных электродаў» на карысць Банка «Дабрабыт» 6,19 млн рублёў запазычанасці па крэдытнай дамове ад 12 мая 2021 года і 61 900 рублёў дзяржпошліны. Паколькі крэдыт выдаваўся пад заклад маёмасці завода, суд пастанавіў арганізаваць распродаж прыналежнай заводу нерухомасці, заводскага абсталявання і станкоў, а таксама транспарту.
З малатка пойдуць цэхі, склады, чатыры грузавыя цягачы DAF 2012 года выпуску, прычэпы да іх, тэхналагічныя лініі, станкі, печы, тэрматунэлі і іншае абсталяванне для вытворчасці электродаў.
Рашэнне можа быць абскарджана на працягу пятнаццаці дзён.
Напярэдадні вайны Светлагорскі завод зварачных электродаў быў найбуйнейшым у Беларусі і адным з буйнейшых у СНД вытворцаў зварачных электродаў. Прадпрыемства адзначылі на раённай і абласной Дошках гонару, яно было буйнейшым экспарцёрам у Расійскую Федэрацыю.
Па стане на чэрвень 2019 года, на прадпрыемстве працавалі 465 чалавек. Людзі атрымлівалі стабільны, вышэйшы за сярэдні па рэгіёне заробак.
Вытворчасць электродаў у Светлагорску была адкрыта ў 2005 годзе прадпрыемствам «Белая Русь» светлагорскага бізнэсмена Пятра Кузьмянка.
У 2010 годзе было створана ТАА «Светлагорскі завод зварачных электродаў». У склад заснавальнікаў увайшло Вінніцкае публічнае акцыянернае таварыства «ПлазмаТэк» — гэта буйны вытворца зварачных электродаў, лідар на рынку СНД.
Украінскі акцыянер інвеставаў у прадпрыемства ў Светлагорску каля $1 млн, яны пайшлі на набыццё новай вытворчай лініі па выпуску электродаў.
У 2013 годзе ТАА «СЗСЭ» ўпершыню прызналі лепшым прадпрыемствам-экспарцёрам Гомельскай вобласці.
Амаль адразу пасля пачатку вайны ва Украіне ўкраінскі мэнэджмент Светлагорскага завода пакінуў Беларусь.
Неўзабаве прадпрыемства пайшло на прастой, а 23 сакавіка на сайце СЗСЭ ад імя кіраўніцтва групы кампаній «ПлазмаТэк» была апублікавана заява аб тым, што дзейнасць Светлагорскага завода зварачных электродаў спынена.
Адначасова на сайце «ПлазмаТэк» зʼявілася паведамленне і аб спыненні дзейнасці кампаніі ў Расійскай Федэрацыі.
-
«Мая праца згарэла». Беларускія бізнэсы страцілі тавар на складах Wildberries, але маюць больш шанцаў на кампенсацыю, чым расіяне
-
20 літраў у бак і ніякіх каністраў? Ці сапраўды на беларускіх запраўках на мяжы з Расіяй увялі ліміты на бензін
-
Кітайскі стартап выпусціў ШІ-мадэль, якая абышла амерыканскія аналагі
Каментары