У Германіі прайшла маштабная спецаперацыя супраць сеткі, якая планавала дзяржаўны пераварот. Ëсць расійскі след
У Нямеччыне спецыяльныя паліцэйскія сілы ў сераду праводзяць спецаперацыю адначасова ў 11 федэральных землях супраць праваэкстрэмісцкай арганізацыі, якая планавала выкрадаць палітыкаў і штурмаваць Бундэстаг. Пра гэта стала вядома выданню Der Spiegel.
Па даручэнні генеральнага пракурора і Федэральнага ўпраўлення крымінальнай паліцыі праваахоўнікі затрымалі 25 мужчын і жанчын, якія, верагодна, належалі да правай тэрарыстычнай арганізацыі або падтрымлівалі яе.
Ператрусы праходзяць у больш чым 130 кватэрах, офісах і складскіх памяшканнях, уключаючы казармы камандавання сіл спецыяльнага прызначэння ў Кальві ў Бадэн-Вюртэмбергу.
Увогуле 52 падазраваных знаходзяцца пад следствам за членства або падтрымку тэрарыстычнай арганізацыі.
Гэта адна з найбуйнейшых паліцэйскіх аперацый такога кшталту, якія калі-небудзь праводзіліся ў Германіі.
Раніцай у сераду больш за 3000 паліцэйскіх праводзілі розныя дзеянні ў Бадэн-Вюртэмбергу, Баварыі, Саксоніі, Гесэне і Цюрынгіі. Афіцэры таксама былі накіраваныя ў Аўстрыю і Італію. Меркаваная правая тэрарыстычная група набіралася пераважна з прадстаўнікоў арганізацыі так званых «грамадзян Рэйха».
«Грамадзяне Рэйха» не прызнаюць існуючы ў Германіі дзяржаўны лад і хочуць замяніць яго на недэмакратычную сістэму. Верагодна, што ў іх радыкалізацыі адыграла сваю ролю канспіралагічная ідэалогія QAnon, якую падзяляла частка тых, хто нападаў на Капітолій ЗША ў Вашынгтоне ў студзені 2021 года.
Паводле высноваў следства, падазраваныя з лістапада 2021 года планавалі ўзброены напад на Бундэстаг і захоп палітыкаў. Лічыцца, што нападнікі разлічвалі на пачатак беспарадкаў у выніку іх дзеянняў і на «пераварот» у Германіі.
Па словах абвінавачвання, мужчын і жанчын аб'ядноўвала глыбокае непрыманне дзяржаўных інстытутаў і дэмакратыі ў Германіі, таму яны, верагодна, планавалі ажыццявіць змену ўлады сілай.
Нагадаем, 2 снежня ў Нямеччыне спецслужбы папярэдзілі пра рызыку дыверсій на крытычнай інфраструктуры.
Каментары
Вось нядаўна пачала, а НН усё тая ж! Двайныя стандарты.