Літва дапусціла перавозку ўкраінскага збожжа праз Беларусь, але без палітычных умоў
Міністр замежных спраў Габрыэль Ландсбергіс заявіў, што транзіт украінскага збожжа праз тэрыторыю Беларусі магчымы, але палітычных перамоў па гэтым пытанні не будзе, паведамляе BNS.
«Паколькі гэта несанкцыянаваныя тавары, гэта азначае, што яны перавозяцца па камерцыйных здзелках. Камерцыйныя арганізацыі сустракаюцца, падпісваюцца дамовы, выплачваюцца грошы, тавары паступаюць у Клайпедскі порт, адтуль — далей у свет. Урад не адсочвае гэтыя тавары, і, шчыра кажучы, я магу нават не ведаць, якія тавары там ходзяць», — сказаў Ландсбергіс журналістам у аўторак у Сейме.
«Сапраўды гэтак жа, калі камерцыйная здзелка ажыццяўляецца з Украіны праз Беларусь, праз любую іншую дзяржаву, для камерцыйных здзелак урад Літвы не мае ніякіх мер або неабходнасці рэгуляваць іх, калі гэта толькі гандаль», — дадаў ён.
На мінулым тыдні Беларусь заявіла ААН, што дазволіць транзітам праз сваю тэрыторыю ў Клайпедскі порт дастаўляць украінскае збожжа.
Мінск указаў, што дасць такі дазвол без папярэдніх умоў, але ў той жа час нагадаў аб сваім запыце дазволіць краіне экспартаваць свае калійныя ўгнаенні, на якія распаўсюджваюцца міжнародныя санкцыі.
Ландсбергіс заявіў, што не будзе весці перамовы па палітычных пытаннях з беларускім рэжымам.
«Калі ёсць палітычныя прэтэнзіі, то ўрад, несумненна, умешваецца, і тут мы ўжо строгія: ніякіх палітычных перамоў з рэжымам Лукашэнкі аб транзіце праз тэрыторыю Беларусі ў Літву не будзе», — сказаў кіраўнік літоўскай дыпламатыі.
Прэзідэнт Гітанас Наўседа ў мінулую суботу назваў прапанову Беларусі пасткай.
Цяпер чытаюць
Хто з палітвязняў выйшаў на свабоду 16 верасня ПОЎНЫ СПІС23
Каментары