Вынесены прысуд аргенцінскаму паліцэйскаму, які катаваў палітвязняў падчас дыктатуры
Суд у Аргенціне прысудзіў да 15 гадоў зняволення былога паліцэйскага Марыа Сандоваля, які сорак гадоў таму, у часы ваеннай дыктатуры, служыў у адным з самых сумна вядомых катавальных цэнтраў краіны, піша «Бі-бі-сі».
69-гадовага Сандоваля прызналі вінаватым у выкраданні і катаваннях студэнта Эрнана Абрыяты, які прытрымліваўся левых поглядаў, знік у 1976 годзе і лічыцца загінулым. Пасля падзення хунты Сандоваль збег з краіны і пасяліўся ў Францыі, дзе стаў чытаць лекцыі ва ўніверсітэце. Аднак у 2019 годзе Францыя выдала яго Аргенціне.
Былога паліцэйскага абвінавачвалі ў датычнасці да выкрадання і катаванняў сотняў актывістаў левага руху з 1976 па 1983 год, калі краінай кіравалі вайскоўцы. Аднак у судзе была заслухана толькі адна справа — студэнта архітэктурнага інстытута Эрнана Абрыяты, якога паліцыя вывалакла з дому ў 1976 годзе і кінула ў самую вялікую тайную турму Аргенціны, што месцілася ў Школе механікаў ВМС Аргенціны (ESMA). Пра яго далейшы лёс нічога не вядома.
Лічыцца, што праз гэтую турму прайшло больш за 5 тысяч аргенцінцаў, якія выступалі супраць ваеннай хунты. У жывых засталося толькі каля ста.
Вязняў дапытвалі і катавалі. Многіх з іх пад канец напампоўвалі наркотыкамі і скідалі з самалётаў у акіян.
Марыа Сандоваль быў адным з самых страшных катаў. Людзі кажуць, што ён любіў прывязваць зняволеных да металічных рам ложкаў і катаваць іх электрашокерам для жывёлы.
Праз два гады пасля таго як вайскоўцы ў Аргенціне былі адхіленыя ад улады, Сандоваль перабраўся ў Францыю. Там ён уладкаваўся працаваць кансультантам па пытаннях абароны і бяспекі, атрымаў французскае грамадзянства і на працягу шасці гадоў нават выкладаў у якасці запрошанага лектара ў Інстытуце краін Лацінскай Амерыкі пры Сарбоне.
Толькі ў 2008 годзе ў лектару Сандовалю апазналі былога паліцэйскага, падазраванага ў выкраданнях і катаваннях сотняў аргенцінскіх актывістаў. Пасля працяглага судовага разбору Вышэйшы адміністрацыйны суд Францыі пастанавіў, што яго можна экстрадаваць на радзіму, бо злачынствы, у якіх ён абвінавачваецца, былі здзейсненыя яшчэ да таго, як ён атрымаў французскае грамадзянства.
Суд над лектарам-катам пачаўся ў Буэнас-Айрэсе сёлета ў верасні. Сандоваль да самага канца адмаўляў сваё дачыненне да выкрадання і знікнення Эрнана Абрыяты і сустрэў прысуд з каменным тварам.
Што датычыць зніклага студэнта, то ніякіх новых падрабязнасцяў пра яго лёс суд не высветліў. Абрыята быў адным з прыкладна 30 тысяч аргенцінцаў, зніклых без следу ў часы хунты.
Зрэшты, шэсць гадоў таму ўсплыла адна трагічная і кранальная падрабязнасць: на сцяне адной з камер былой турмы, цяпер пераўтворанай у музей і мемарыял, быў выяўлены надпіс «Mónica te amo» («Моніка, я люблю цябе»), адрасаваны жонцы Эрнана, Моніцы Дзітмар, і яго ініцыялы пад гэтым пасланнем.
-
Бенгальскія агні на шампанскім сталі прычынай пажару ў бары ў Швейцарыі, дзе загінулі 40 чалавек
-
Кіруючая партыя Германіі хоча высылаць сірыйцаў, якія беглі ад грамадзянскай вайны, назад на радзіму — нават рэгулярнымі рэйсамі
-
Еўракамісія пачала расследаванне з-за тыктокаў, створаных з дапамогай штучнага інтэлекту, якія заклікаюць да выхаду Польшчы з ЕС
Цяпер чытаюць
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»3
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»
Вайб-праграмаванне зменіць ролю распрацоўшчыка, RLVR, і калі лопне бурбалка. Беларус-інжынер у галіне ШІ, які працуе ў ЗША, расказаў, што нас чакае ў 202633
Каментары