Баранавіцкі фельчар хуткай дапамогі асуджаны за палітыку. Ён быў адным з найлепшых медыкаў горада
А таксама стварыў карысную праграму для калег.
У Баранавічах фельчара хуткай дапамогі, якога не раз прызнавалі найлепшым медыкам горада, абвясцілі «экстрэмістам», піша BGmedia.
МУС Беларусі 6 сакавіка абнавіла «пералік грамадзян Беларусі, замежных грамадзян або асоб без грамадзянства, датычных да экстрэмісцкай дзейнасці». У «спіс экстрэмістаў» дадалі 20 чалавек, цяпер у ім 6 373 прозвішчы. «Экстрэмістам» прызналі ў тым ліку фельчара хуткай дапамогі ў Баранавічах Міхаіла Чатырбока.
Міхаілу Чатырбоку 39 гадоў. Дзе ён працуе зараз, невядома, але раней ён быў фельчарам хуткай дапамогі ў Баранавічах. Яго не раз прызнавалі найлепшым медыкам горада, узнагароджвалі ганаровымі граматамі.
У верасні 2023 года Міхаіл Чатырбок разам са сваёй брыгадай удзельнічаў у III адкрытых рэспубліканскіх спаборніцтвах брыгад хуткай медыцынскай дапамогі, «на якіх медыкі паказвалі свае тэарэтычныя і практычныя веды і навыкі».
У той жа месяц дзяржінфармагенцтва БелТА пагутарыла з фельчарамі брыгад хуткай дапамогі і апублікавала тэкст. Так дзяржжурналісты напісалі пра Міхаіла Чатырбока:
«Андрэй Фёдараў, Міхаіл Чатырбок і іх кіраўнік лекар хуткай дапамогі Аляксандр Горбач — рэанімацыйная брыгада з Баранавічаў. Гэтыя мужчыны па-сапраўднаму ведаюць, што такое праца ў камандзе».
Міхаіл Чатырбок вядомы і тым, што ствараў бясплатныя праграмы (прыкладанні) для калег, якія працуюць па профілі неадкладнай меддапамогі, піша тэлеграм-канал «Витебск, я гуляю!».
Мужчыну дадалі ў «спіс экстрэмістаў» 6 сакавіка. Там пазначана, што яго судзілі ў Брэсцкім абласным судзе па абедзвюх частках артыкула 361—4 КК РБ (спрыянне экстрэмісцкай дзейнасці). Гэты артыкул у апошні год прымяняюць для судоў па «справе Гаюна».
У дакуменце пазначана, што ў Міхаіла Чатырбока «судзімасць не пагашана». Хутчэй за ўсё, яму прысудзілі «хатнюю хімію» (абмежаванне волі без накіравання ў папраўчую ўстанову адкрытага тыпу).
Памілаваныя 15 чалавек, сярод якіх 13 палітвязняў15
Каментары