Сабака ўцёк з Беларусі ў Польшчу ў канцы мінулага года, яго знайшлі жыхары польскай Белавежы каля мяжы з Беларуссю, дзе ён зараз і жыве. Папярэдні гаспадар сабакі не зацікаўлены ў вяртанні жывёлы, таму яму шукаюць новы дом. Таксама сабаку патрэбна медыцынская дапамога і харчаванне. Яго гісторыю расказвае польская «Gazeta Wyborcza».
Мясцовая жыхарка Яана Канярска заўважыла сабаку 13 снежня каля мясцовага рэстарана, але падумала, што ён проста чакае гаспадароў. Увечары, сустрэўшы сабаку ў іншым месцы, яна вырашыла забраць яго дадому і накарміць.
«Ён быў худы, мокры, з разадраным носам. А яшчэ ў яго была ранка на галаве, нібыта яго хтосьці нечым ударыў», — распавяла Яана.
Жанчына дала аб’яву пра знойдзенага сабаку на мясцовых сайтах, але ніхто не адгукнуўся. Пакінуць жывёліну ў сябе яна таксама не змагла, і тады яго часова ўзялі суседзі, аспіранты Інстытута вывучэння млекакормячых Польскай акадэміі навук. Яны далі сабаку імя Тобі і звазілі да ветэрынара. Аказалася, што жывёла мае чып, а рэгістрацыя сабакі была ў Беларусі.
Аспіранты змаглі звязацца з беларускім гаспадаром сабакі і той паведаміў, што сабаку чатыры гады і знік ён яшчэ ў сярэдзіне лістапада. Пасля некалькіх званкоў стала зразумела, што мужчына не забярэ сабаку, бо зараз працуе ў Нямеччыне і ў Польшчу па сабаку не паедзе.
Як сабака патрапіў у Польшчу — незразумела, гаспадар адказаць на гэтае пытанне не змог.
Мяркуецца, што гаспадар мог сам выкінуць сабаку ў Польшчы, калі накіроўваўся на працу ў Нямеччыну. Яшчэ адной версіяй называецца тое, што сабака мог рушыць услед за мігрантамі, якія пераходзілі беларуска-польскую мяжу.
«Думаем, ён мог з нейкай групай пралезці пад плотам — гэта растлумачыла б ранку на галаве сабакі», — мяркуе Яана.
У выніку сабаку сталі шукаць новы дом. Ён аказаўся не агрэсіўным і кантактным, актыўным і таварыскім, добра ладзіў з іншымі сабакамі, быў навучаны камандам. Часовыя гаспадары таксама не могуць яго пакінуць, бо часта яны не дома.
«Тобі — цудоўны і радасны малады сабака, уцякач з Беларусі. Ён паліглот. За месяц пражывання ў Белавежы ён меў кантакт з беларускай, рускай, галандскай, англійскай, хіндзі, харвацкай і, вядома, польскай мовамі і заўсёды рэагаваў пазітыўна. Дапамажыце знайсці яму дом, мы просім вашай падтрымкі ў доглядзе яго», — напісана ў аб’яве па пошуку гаспадара для сабакі.
На дапамогу сабаку збіраюць сродкі, у тым ліку на кастрацыю, корм, ляжанку і іншыя патрэбы. Усе грошы, якія не будуць выдаткаваныя, паедуць разам з Тобі ў ягоны новы дом. Калі вы хочаце звязацца з людзьмі, якія даглядаюць Тобі, то можаце напісаць арганізацыі «Tutejsi».
Гэта ўжо не першы беларускі сабака, які па нейкіх прычынах перайшоў беларуска-польскую мяжу і спрабуе знайсці шчасця ў іншай краіне. Улетку 2022 года паведамлялася пра бельгійскую аўчарку па мянушцы Стыў. Гэты сабака служыў у беларускіх памежнікаў, тройчы ад іх збягаў і ўцякаў у Польшчу. У выніку там ён і застаўся.
Каментары
собака живет 15 лет. я живу уже 3-ю собачью жизнь. так что грех жаловаться