«Знайшлі дакумент за подпісам Буданава». Вынесены прысуд па справе за «агентурную дзейнасць на карысць Украіны»
У Гомельскім абласным судзе 9 сакавіка агучылі прысуд па справе за «агентурную дзейнасць на карысць Украіны», паведамляюць праваабаронцы.
Грамадзяніну Украіны Паўлу Купрыенку прызначылі паводле арт. 358-1 (агентурная дзейнасць) сем гадоў калоніі ва ўмовах узмоцненага рэжыму.
Жыхара Гомельшчыны Тараса Мачынскага абвінавацілі ў «здрадзе дзяржаве» (ч. 1 арт. 356 КК) і прысудзілі 10 гадоў калоніі ва ўмовах узмоцненага рэжыму.
32-гадовага Дзмітрыя Салавянчыка прызналі вінаватым ва «ўкрывальніцтве слядоў цяжкага злачынства» (ч. 1 арт. 405 КК) і прызначылі штраф у памеры 400 базавых велічынь (14 800 рублёў).
Такі прысуд вынес суддзя Руслан Царук. Працэс праходзіў з 14 лютага ў закрытым рэжыме.
Чатыры месяцы таму на дзяржаўным тэлебачанні выпусцілі відэасюжэт, у якім паведамлялася, што «КДБ Беларусі спыніў дзейнасць агентуры ваеннай разведкі Украіны». У сюжэце паказваюцца тры затрыманыя. Гэта грамадзянін Украіны, прадпрымальнік Павел Купрыенка і два грамадзяніна Беларусі, жыхары Гомельшчыны Дзмітрый Салавянчык і Тарас Мачынскі. Пры гэтым, паведамляецца, што Мачынскі атрымаў беларускае грамадзянства толькі ў 2010 годзе — прапагандысты яго называюць «былым украінцам». А Салавянчык працаваў кур'ерам у кампаніі Купрыенкі.
Паведамляецца, што ў Паўла Купрыенкі «былі заданні, у тым ліку, па маніторынгу грамадска-палітычнай абстаноўкі ў Беларусі». У яго нібыта знайшлі дакумент за подпісам начальніка Галоўнага ўпраўлення разведкі Мінабароны Украіны Кірыла Буданава. Прапагандысты сцвярджаюць, што Купрыенку завербавалі ўкраінскія спецслужбы.
Тараса Мачынскага абвінавачваюць у тым, што ён перадаваў даныя аб размяшчэнні і перасоўванні па Беларусі вайсковай тэхнікі Купрыенку, а той, у сваю чаргу, — украінскім спецслужбам.
Паведамляецца, што Салавянчыка «выкарыстоўвалі ўцёмную». У відэасюжэце распавядаюць, што Дзмітрый здымаў перамяшчэнне ваеннай тэхнікі ў Беларусі і прасіў пра гэта родных, а потым перадаваў Купрыенку, «не ведаючы, для чаго яны яму».
20 кастрычніка пра іх затрыманне выказваўся кіраўнік КДБ Іван Церцель. «Мы бачым актывізацыю вядзення агентурнай разведкі з боку ўкраінскіх замежных спецслужбаў. Зусім нядаўна намі была спыненая праца на нашай тэрыторыі створанай ваеннай выведкай Украіны рэзідэнтуры. Затрыманы рэзідэнт, грамадзянін Украіны, і двое нашых грамадзян, якія ўступілі на шлях здрады і працавалі ў інтарэсах замежнай дзяржавы», — сказаў ён.
КДБ спатрэбілася тры месяцы для расследавання гэтай справы і перадачы яе ў суд.
Цяпер чытаюць
«Патрабавалі, каб я з калегамі пры дзецях па-беларуску не размаўляла». Ці сутыкаюцца беларускамоўныя з булінгам у краіне6
Каментары