Лукашэнка: «У актыўную фазу ўступілі маштабныя прыватызацыйныя працэсы»
Ён сустрэўся з дэлегацыяй нямецкіх бізнэсоўцаў, якія прыехалі на сёлетні «Мінскі форум».
Аляксандр Лукашэнка сустрэўся з дэлегацыяй нямецкіх бізнэсоўцаў, якія прыехалі на сёлетні «Мінскі форум». Ён прапанаваў разгледзець магчымасць стварэння няўрадавае беларуска‑нямецкае Рады дзелавога супрацоўніцтва.
Аляксандр Лукашэнка лічыць, што ў Беларусі ёсць шмат галін, куды могуць прыйсці германскія інвестары. «Перш за ўсё гэта тыя сферы, у якіх вы з’яўляецеся прызнанымі лідэрамі: аўтамабільнае і сельскагаспадарчае машынабудаванне, хімічная і нафтахімічная галіны, энергетыка, высокія тэхналогіі», — сказаў ён, звяртаючыся да германскіх гасцей.
На ягоную думку, вялікія магчымасці ёсць у нас для ўзаемадзеяння з Германіяй у рамках маштабных праектаў па развіцці інфраструктуры, перапрацоўчай прамысловасці і сельскай гаспадаркі.
«Думаю, што нашым германскім сябрам час сур’ёзна задумацца аб адкрыцці свайго банка ў Беларусі», — сказаў ён таксама.
Аляксандр Лукашэнка адзначыў, што «ў нас створаны спрыяльныя ўмовы для прыцягнення капіталаў у прыватызацыю дзяржаўнай уласнасці, развіццё малых і сярэдніх гарадоў, свабодных эканамічных зон».
Ён канстатаваў, што за апошні час у Беларусі зроблены комплекс захадаў, скіраваных «на лібералізацыю эканомікі і стварэнне спрыяльнага бізнэс‑асяроддзя». «У актыўную фазу ўступілі маштабныя прыватызацыйныя працэсы», ‑‑ адзначыў Лукашэнка.
Каментары