У Ляйпцыгу паставілі балет пры дапамозе штучнага інтэлекту. Упершыню ў свеце
Прэм'ера прайшла 28 мая, першыя водгукі крытыкаў сведчаць, што відовішча выйшла больш чым уражальнае.
Пакуль ідуць спрэчкі, ці пагражае штучны інтэлект знішчыць працоўныя месцы або нават захапіць уладу над чалавецтвам, кіраўнік Ляйпцыгскай оперы Марыа Шродэр вырашыў перайсці ад тэорыі да практыкі, піша Deutsche Welle.
Для працы над новым спектаклем ён запрасіў брытанскага музыканта і эксперыментатара ў галіне штучнага інтэлекту Гары Ефа, вядомага пад сцэнічным псеўданімам Reeps100.
Гэта майстар жанру бітбокс, калі ўся музыка пішацца пры дапамозе голасу. Але Еф не проста імітуе гукі ўдарных музычных інструментаў, баса і іншых інструментаў, але і шырока прымяняе нейрасетку для апрацоўкі атрыманых трэкаў.
Падчас балета пад назвай Fusion (у перакладзе — сінтэз, або зліццё), музыкант са сваёй тэхнікай і двума мікрафонамі ўдзельнічае ў працы аркестра.
Сам балет падзелены на пяць раздзелаў: «Генезіс», «Штучны інтэлект», «Перазагрузка», «Дэканструкцыя» і, нарэшце, тытульная «Зліццё».
Як вынікае з анатацыі на сайце тэатра, спектакль прысвечаны магчымасцям чалавечага голасу, яго межам і здольнасці выказаць гэта праз танец. Штучны інтэлект ужываўся таксама пры распрацоўцы сцэнаграфіі.
Прэм'ера ў Ляйпцыгу прайшла 28 мая, першыя водгукі крытыкаў сведчаць, што відовішча выйшла больш чым уражальнае.
«Мы даём штучнаму інтэлекту шанец стаць мастацкім», — цытуе аднаго са стваральнікаў балета, драматурга Ціла Райнхарда нямецкая медыяпраграма Tagesschau.
А міжнародны анлайн-партал Designboom, які базуецца ў Мілане, Пекіне і Нью-Ёрку, і наогул называе Fusion першым у свеце балетам, створаным з дапамогай штучнага інтэлекту.
Цяпер чытаюць
У Магілёве на доме, які аддалі пад расійскае пасольства, замалявалі мурал з «Пагоняй». Хоць экспертыза забараняла гэта рабіць18
У Магілёве на доме, які аддалі пад расійскае пасольства, замалявалі мурал з «Пагоняй». Хоць экспертыза забараняла гэта рабіць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку6262
Каментары