У Брэсцкай вобласці за 11 месяцаў налічылі 583 «экстрэмісцкія злачынствы»
Пад старшынствам пракурора Брэсцкай вобласці Віктара Клімава ў Брэсце правялі каардынацыйную нараду па барацьбе са злачыннасцю і карупцыяй. На мерапрыемстве з удзелам прадстаўнікоў усіх сілавых структур сярод іншага абмеркавалі меры па барацьбе з «экстрэмісцкай» дзейнасцю.
Сярод іншага на гэтай нарадзе прагучала лічба, колькі «экстрэмісцкіх злачынстваў» было ўчынена на Брэстчыне за студзень-лістапад гэтага года — 583.
У асноўным гэта «супрацьпраўныя дзеянні, учыненыя з выкарыстаннем інфармацыйных тэхналогій і спалучаныя з пагрозамі гвалтоўных дзеянняў і абразамі», паведамляе абласная пракуратура.
Удзельнікі пасяджэння прыйшлі да высновы, што трэба ўзмацніць меры па «недапушчэнні распаўсюджвання дэструктыўных ідэй і каштоўнасцяў», а для гэтага трэба сачыць за інфармацыяй у інтэрнэце і аператыўна прызнаваць інтэрнэт-рэсурсы экстрэмісцкімі матэрыяламі.
Як вядома, апошнія тры гады ў Беларусі «экстрэмісцкія матэрыялы» ў трактоўцы ўладаў і сілавікоў — тыя матэрыялы, якія абсалютна нічога экстрэмісцкага ў сабе не маюць. Такі ярлык вешаецца фактычна на любую крыніцу інфармацыі, якая не залежыць ад уладаў і не адлюстроўвае афіцыйны пункт гледжання на падзеі.
Каментары