Мінчанін Слава Пушка хоча, але не можа паваяваць за Расію. І просіць скінуцца яму на замену пашпарта, каб дабрацца да фронту
За сваё жыццё 35‑гадовы Вячаслаў Бібікаў не назапасіў нічога — акрамя сямі крымінальных спраў. Марыць зарабіць на кватэру. Кажа, лепш паваяваць, чым бадзяцца.
Па расійскіх суполках, прысвечаных «СВА» (так расійская прапаганда называе вайну), распаўсюджваецца допіс беларуса Славы Пушкі, які просіць дапамагчы грашыма — маўляў, неабходна зрабіць новы пашпарт, каб пусцілі ў Расію. Многія не вераць яму, кажуць, што махляр. Але Слава настойвае: абавязкова паеду на фронт, толькі дайце грошай!
Пакідае гэтыя абвесткі 35‑гадовы Вячаслаў Бібікаў (Слава Пушка — яго псеўданім). Нарадзіўся ён у Мінску, скончыў Мінскае дзяржаўнае прафесійна-тэхнічнае вучылішча №38 перапрацоўчай прамысловасці.
У калекцыі маладога мужчыны, па інфармацыі Belpol, сем судзімасцяў. Пачаў свае прыгоды яшчэ ў 2008 годзе, калі скраў акумулятар з адной машыны і спрабаваў выцягнуць нейкія рэчы з іншай. Тады ж сцягнуў у тралейбусе чужы мабільнік.
Быў і разбой — забраў сумку ў жанчыны на мінскім вакзале, некалькі разоў выносіў штосьці з чужых кватэр. Аднойчы забраў сабе чужы ровар з пад’езда.
Да калоніі Вячаслаў не даязджаў, хіба што паўгода пасядзеў у арыштным доме.
Апошнім вядомым месцам працы Бібікава, згодна з данымі стаў ЖЭС №67 Ленінскага раёна — там Вячаслаў быў рабочым.
Цяпер ён прыдумаў іншы спосаб палепшыць сваё матэрыяльнае становішча — хоча ваяваць за Расію. Але і тут гаротніку не шанцуе — ці наадварот.
Бібікаў прызнаецца, што на вайну збіраецца выключна для таго, каб зарабіць на кватэру — ніякіх высокіх ідэалаў у яго няма. Але ідэя хутка атрымаць шмат грошай заваблівае.
Кагосьці, хто б адгаварыў яго ад дурной думкі, у Вячаслава няма — маці і бабуля памерлі. Адзіным родным чалавекам ён лічыць 12‑гадовую дачку (мужчына ў разводзе).
Бібікаў падаў заяўку, каб стаць наймітам — але не атрымаў ніякага адказу. Тады вырашыў сам ехаць у Расію і на месцы прасіцца на фронт.
Сцвярджае, што перспектыва стаць інвалідам ці загінуць, змагаючыся за чужыя палітычныя амбіцыі, яго не пужае.
Але ж на беларуска-расійскай мяжы высветлілася, што Вячаслаў нават не паглядзеў на тэрмін дзеяння свайго пашпарта — а той ужо даўно пратэрмінаваны. Апошнія гады працаваў неафіцыйна, таму і дакумент быў не вельмі патрэбны. У выніку мужчыне прыйшлося вярнуцца на радзіму.
Цяпер праз суполкі ва «УКантанце» ён спрабуе атрымаць фінансавую дапамогу ад расіян — распавядае тым, што яму трэба прыблізна 3000 расійскіх рублёў, каб хуценька зрабіць новы пашпарт.
Вырашыць пытанне з галоўным дакументам за тыдзень каштуе тры базавыя — 135 рублёў. Прыблізна столькі Бібікаў спрабуе сабраць з расіян — але яны беларусу не вераць і называюць махляром.
«Дапамажыце. Лепш паслужу, чым бадзяцца. Не ведаю, наколькі гэта магчыма, але сказалі, што можна нават будзе паспрабаваць падаць на расійскае грамадзянства пасля СВА», — разважае пакуль жывы Бібікаў.
Навапалачанін завербаваўся ў расійскае войска і паехаў ваяваць. Цяпер яго шукае дачка
Палявод калгаса «Чырвоны баец» з магілёўскага Кіраўска перасеў з сеялкі на танк, а потым — на баявы мапед. І паехаў штурмаваць Запарожжа
Беларус паехаў ваяваць за Расію, падарваўся на міне і здаўся ў палон. Украінскі баец нёс яго на спіне 10 км
18‑гадовы курсант Вайсковай акадэміі з Ляхавіч нікому нічога не сказаў, забраў дакументы і паехаў ваяваць за Расію. Цяпер па ім плачуць
Цяпер чытаюць
Пашпарты беларусаў, якія галасуюць на выбарах у КР, апрацуе кампанія, у якой апошняя ўцечка была ў 2026-м, а заснавальнікі — расіяне29
Каментары
Nasamrech - 90 a ne 135. Mozhna i za 45, ale chakac treba budze mesac.