Раніцай Расія атакавала Украіну крылатымі ракетамі з Ту-95МС і «Кінжаламі»
Пра выбухі паведамляюць у Крывым Розе, Харкаве, Хмяльніцкім, Дняпры, Запарожжы.
Раніцай 8 студзеня Расія атакавала Украіну дзясяткамі крылатых ракет, якія запусціла з 11 стратэгічных бамбардзіроўшчыкаў Ту-95МС з раёна Каспійскага мора, піша Бі-бі-сі.
Пасля 6 гадзін ракеты некалькімі хвалямі заляцелі ва Украіну, загучала паветраная трывога. Адначасова ў Расіі ўзляцеў МіГ-31 — носьбіт балістычных ракет «Кінжал».
Паветраныя сілы зафіксавалі ўзлёт яшчэ аднаго Міг-31к з аэрадрома Саваслейка Ніжагародскай вобласці. Папярэджваюць аб магчымым паўторным пуску «Кінжала».
Частка ракет ляціць на захад Украіны.
Тэлеграм-акаўнты паведамляюць пра выбухі ў Крывым Розе, Харкаве, Хмяльніцкім, Дняпры, Запарожжы.
Інфармацыі пра наступствы пакуль мала.
На цяперашні момант вядома, што расійскія войскі нанеслі не менш за чатыры ўдары па Харкаве, а ў горадзе Зміеў патрапілі ў прыватны дом. Ёсць пацярпелыя.
«Гэтай раніцай вораг біў па прамысловых аб'ектах горада. На дадзены момант адна пацярпелая жанчына. Пажар ужо тушаць нашы ратавальнікі, з параненай працуюць медыкі», — сказаў кіраўнік Харкава Ігар Церахаў.
У Запарожжы ў выніку камбінаванай атакі крылатых і балістычных ракет па розных напрамках у абласным цэнтры прагучала 5 выбухаў, паведаміў начальнік АВА Юрый Малашка.
Ракеты трапілі ў жылыя раёны — на адкрытыя тэрыторыі і побач з дамамі. Вядома пра двух пацярпелых — мужчыну і жанчыну.
У Хмяльніцкім паведамляюць пра перабоі з электрычнасцю.
У Крывым Розе пашкоджаны гандлёвы цэнтр і больш за два дзясяткі прыватных дамоў. 58-гадовы мужчына атрымаў асколачныя раненні.
У паселішчы Лазаватка пад абстрэлам загінула 62-гадовая жанчына.
У Новамаскоўску выбуховай хваляй перавярнула маршрутку, якая праязджала міма. Пашкоджаны тры адміністрацыйныя будынкі, дзве запраўкі, пяціпавярхоўка, аўтамабілі. У горадзе, паводле папярэдніх звестак, 24 пацярпелых. Пяцёра з іх — дзеці.
Цяпер чытаюць
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве44
Каментары