Трыны Робінс не стала 10 красавіка ў Сан-Францыска на 86-м годзе жыцця.
Пра гэта паведамляе выданне «Беларусь и мир» са спасылкай на New York Times.
Трына вядомая тым, што стала адной з першых і найбольш выбітных жанчын у Амерыцы, якія працавалі ў гэтай галіне, у якой раней дамінавалі ў асноўным мужчыны.
У прыватнасці, у 1985 годзе яна намалявала для DC серыю коміксаў з культавым персанажам — Цуд-жанчынай (Wonder Woman), пасля таго як чатыры дзесяцігоддзі гэта рабілі толькі мужчыны.
А ў 1970 годзе разам з іншай калегай выпусціла першую ў ЗША кніжку коміксаў «It Ain't Me, Babe», цалкам намаляваную выключна жанчынамі.
Да таго, як цалкам стаць мастачкай і рэдактаркам часопісаў коміксаў, Трына сур'ёзна займалася дызайнам і продажам адзення, у тым ліку адкрыўшы буцік на Манхэтэне.
Яна сябравала з Джымам Морысанам і апранала фолк– і рок-музыкантаў, сярод якіх былі Донаван, Кас Эліят, Дэвід Кросбі.
А спявачка Джоні Мітчэл нават пачала адну са сваіх песень «Ladies Of The Canyon» натхнёным ёю чатырохрадкоўем: «Трына носіць каралі-вампум, чэрціць лініі ў сваім альбоме…».
Трына нарадзілася ў Брукліне ў 1938 годзе. Яна была малодшай дачкой, старэйшую звалі Харыет. Бацька Макс працаваў краўцом, маці Бэсі — настаўніцай другіх класаў.
У сваёй аўтабіяграфіі «Апошняя, хто застаўся» мастачка піша, што не любіла сваё дзявочае прозвішча — Перлсан, бо яно несапраўднае — атрыманая пры прыбыцці ў ЗША.
Справа ў тым, што яна паходзіла з беларускіх яўрэяў і ў мястэчку Дубай яе сям'я насіла прозвішча Перачуднік (Perechudnik), што, як адзначае аўтар, у перакладзе азначае нешта кшталту «маленькі цясляр».
Некралогі, прысвечаныя Трыне Робінс, апублікавалі многія амерыканскія выданні, у тым ліку New York Times, Washington Post і Forbes.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім1414
Каментары