Знакаміты гмах у цэнтры Варшавы свяціўся сінім — прычым тут Пракоп’еў?

Палац навукі і культуры ў самым цэнтры Варшавы — упадабаная фотазона ўсіх гасцей і жыхароў горада. Будынак, які вельмі нагадвае гмахі МДУ, МЗС і аналагічныя жылыя дамы ў Маскве, пасля вайны быў пабудаваны як «падарунак СССР польскаму народу».

Гэты гмах — не толькі архітэктурная дамінанта цэнтра польскай сталіцы і прычына лютых спрэчак на тэму «зносіць ці не зносіць», але яшчэ і своеасаблівы маяк. Часам на палацы з'яўляецца яркае каляровае падсвятленне, калі ёсць годная нагода.

Так, на Дзень незалежнасці і іншыя вялікія дзяржаўныя святы сталінка афарбоўваецца ў бела-чырвоныя колеры польскага сцяга. А 9 жніўня палац на адзін вечар становіцца беларускім — у бел-чырвона-белых колерах. Такім чынам улады Варшавы дэманструюць салідарнасць з беларускім дэмакратычным рухам. У Сусветны Дзень Зямлі гмах звычайна падсвятляецца белым, а, напрыклад, у дзень распаўсюджвання інфармацыі аб ВПЧ — фіялетавым.

Увечары ў нядзелю адзін з бакоў будынка афарбаваўся ў сіні колер. Ніякіх святаў або міжнародных акцый у гэты дзень не было. На сэнс гэтай падсветкі нічога не паказвала. Але неўзабаве стала вядома, што падсвятленне звязана з Беларуссю.

Раніцай у панядзелак Блок Пракоп'ева-Ягорава, які ўдзельнічае ў выбарах у Каардынацыйную раду, распаўсюдзіў зварот спікера КР Андрэя Ягорава. Ён прамаўляў на фоне палаца, які свяціўся сінім. І заявіў, што сталінка «стала Маяком беларусаў свету». Ягораў у звароце падзякаваў за падтрымку і вырашэнне пытання з падсветкай прэзідэнта Варшавы Рафала Тшаскоўскага.

«Наша Ніва» спытала ў іншага лідара блока Вадзіма Пракоп'ева пра мэты гэтага перфомансу. Грамадскі дзеяч адказаў коратка:

«Навошта мы падсвятлілі гмах у Варшаве? Каб нашыя СМІ ўбачылі нарэшце выбары, якія ва ўпор адмаўляюцца заўважаць. Каб распавялі пра праграмы кожнага спісу, і каб рэгулярныя дэбаты праводзіў не ўкраінскі блогер, а нашыя дэмакратычныя незалежныя СМІ».

На пытанне аб тым, колькі каштавала такое падсвятленне, у штабе блока адказваць не сталі. Сам Пракоп'еў на дэбатах з Паўлам Латушкам распавёў, што на падсветку «скінуліся па 12 даляраў усе ўдзельнікі спіса». Нам вядома, што для арганізацыі гэтай акцыі давялося прайсці шмат узгадненняў з гарадскімі ўладамі. Пытанне сапраўды дайшло да кіраўніка горада, які дазволіў падсвятліць Палац навукі і культуры ў колеры Блока Пракоп'ева-Ягорава.

Павялічыць

Выбары ў Каардынацыйную раду пройдуць анлайн 25-27 траўня. Галасаваць можна будзе толькі пры наяўнасці сапраўднага або пратэрмінаванага беларускага пашпарта.

У выбарах удзельнічаюць 12 выбарчых спісаў: «Салідарнасць» Георгія Дзмітрука, «Воля» Вадзіма Кабанчука, «Еўрапейскі выбар» Аляксандра Дабравольскага, «Наша справа» Розы Туранбекавай, «Закон і правапарадак» Аляксандра Азарава, «Нолас дыяспар — адзінства над межамі» Надзеі Нортан, «Незалежныя беларусы» Максіма Шабуцкага, Блок Пракоп'ева-Ягорава, каманда Латушкі і рух «За Свабоду», «Хопіць баяцца» Таццяны Мартынавай, «Краіна для жыцця» Віталя Савюка і «Моладзевы наступ» Лізаветы Пракопчык.

• 21
• 0
• 4
• 33
• 2
• 3
• 5
• 0