Паездка на каршэрынгу для дзяўчыны скончылася штрафам 14 000 рублёў
Дзяўчына трапіла ў аварыю яшчэ зімой, але выплачвае доўг перад сэрвісам Anytime да гэтага часу. Напэўна, гэта новы антырэкорд, піша Onliner.by.
Александрына апублікавала фатаграфіі з месца ДТЗ, а таксама агучыла ў каментарах сваю версію: «Занесла на снезе ў студзені, дарогі не пачышчаныя. Апынулася на сустрэчцы, па законе віна мая. Шкоду кампенсую я, налічылі 14 000 рублёў. Далі растэрміноўку на 11 месяцаў пасля 40-хвілінных пераконванняў».
У розных каршэрынгавых кампаній умовы арэнды і прадугледжаная дамовай адказнасць могуць адрознівацца. Таму ўважліва чытайце карыстацкія пагаднення.
Александрына кажа: больш сэрвісамі арэнды аўто не карыстаецца, выдаліла ўсе такія дадаткі: «Лепш на сваё аўто накаплю».
— Пасля аварыі я адразу патэлефанавала ў сэрвіс, арэнду сказалі не спыняць, а перавесці аўто ў рэжым «стаянкі». Спецыяліст каршэрынгу прыехаў на месца ДТЗ толькі праз гадзіну пасля прыезду супрацоўнікаў ДАІ. Без размоў уручыў ліст з запрашэннем на «ацэнку шкоды». Я прыехала туды за пяць хвілін да прызначанага часу (гэта было на наступны дзень), але ўбачыла, што палова машыны ўжо разабрана і апісана. Пасля «ацэнкі» са мной не звязваліся датуль, пакуль не выставілі суму штрафу, гэта значыць блізу двух тыдняў.
А далей усё як і ва ўсіх. Не заплаціце — у суд. Як мне патлумачылі, 14 000 рублёў — гэта толькі шкода, без штрафаў і прастою. Спачатку на аплату далі 6 месяцаў, а ў мяне заробак удвая меншы, чым штомесячны плацёж! У выніку ўгаварыла павялічыць тэрмін да 11 месяцаў.
А вось як штраф каментуюць у сэрвісе Anytime:
— Гэтую суму нельга разглядаць як штрафныя санкцыі з боку кампаніі, у гэтым выпадку аўтамабілю кампаніі прычыненыя механічныя пашкоджанні, у адпаведнасці з нормамі заканадаўства шкода ацэненая незалежным ацэншчыкам. Памер шкоды — гэта сума, разлічаная незалежным ацэншчыкам, што пацвярджае памер шкоды.
Кліенту выстаўлена сума патрабавання, у якую ўваходзіць непасрэдна памер шкоды, выдаткі па ацэнцы гэтай шкоды, а таксама выдаткі па аплаце паслуг эвакуатара для дастаўкі з месца здарэння да месца ацэнкі і наступнага рамонту.
Ніякіх штрафных санкцый, няўстоек і іншых грашовых патрабаванняў кліенту не выстаўлялася, парадак выплаты страт, панесеных кампаніяй, вырашаны з кліентам шляхам перамоваў і заключэння пагаднення аб добраахвотнай кампенсацыі з індывідуальным графікам плацяжоў. Умовы заключэння такіх пагадненняў разглядаюцца ў індывідуальным парадку па кожным здарэнні з удзелам нашых кліентаў і з улікам шматлікіх фактараў».
Цяпер чытаюць
Качанава прапанавала ўвесці адказнасць за «няпраўду ў тыктоку»11
Каментары