«Калі ў Францыі абмяркоўваўся закон аб аднаполых шлюбах, на вуліцы выйшла палова краіны, якая адстойвала меркаванне, што шлюб — гэта саюз паміж мужчынам і жанчынай».
Спецпрадстаўнік прэзідэнта Расіі па міжнародным культурным супрацоўніцтве Міхаіл Швыдкой назваў Расію «хрысціянскай» і «кансерватыўнай» краінай. Адмову ад заходніх каштоўнасцяў ён лічыць «не самым простым пытаннем», піша РБК.
Расія з'яўляецца «хрысціянскай краінай», нягледзячы на разнастайнасць нацыянальнасцяў і культур. Пра гэта на Пецярбургскім міжнародным эканамічным форуме (ПМЭФ) заявіў спецпрадстаўнік прэзідэнта Расіі па міжнародным культурным супрацоўніцтве Міхаіл Швыдкой.
«У нас ёсць вялікая доля людзей, якія прадстаўляюць цюркамоўныя культуры, значная доля людзей, якія прадстаўляюць культуры сярэдняўсходнія, культуры будысцкія, ёсць тыя, што вызнаюць юдаізм, — адзначыў Швыдкой. — Але ўсё ж Расея-краіна хрысціянская. У гэтым сэнсе мы не можам сказаць, што падмурак нашай культуры знаходзіцца па-за хрысціянскіх каштоўнасцяў».
Адмову ад заходніх культурных каштоўнасцяў Швыдкой назваў «не самым простым пытаннем». Гістарычна, на ягоную думку, Расіі «заўсёды ўсё было цікава». «Мы адстойваем традыцыйныя каштоўнасці, і паверце мне, што традыцыйныя каштоўнасці ў Еўропе і ў Амерыцы падтрымлівае значная колькасць людзей, — працягвае Швыдкой. — Калі ў Францыі абмяркоўваўся закон аб аднаполых шлюбах, на вуліцы выйшла палова краіны, якая адстойвала меркаванне, што шлюб — гэта шлюб паміж мужчынам і жанчынай».
Швыдкой таксама назваў Расію «кансерватыўнай» краінай, адзначыўшы, што гэта тое, што неабходна ў сучасным свеце: «але пры гэтым Расія — краіна, якая змяняецца, — дадаў спецпрадстаўнік прэзідэнта Расіі. — Важна зразумець, што кансерватызм не адмяняе развіцця».
Па даных апытання Фонду «Грамадская думка» на 2023 год, 62% расіянаў лічаць сябе праваслаўнымі, 8% вызнаюць іслам, 23% сцвярджаюць, што не вызнаюць ніякія рэлігіі.
Каментары