У Балівіі вайскоўцы здзейснілі спробу перавароту. Прэзідэнт выйшаў да іх
«Мы вернем сабе радзіму», — заявіў мяцежны военачальнік Хуан Хасэ Суньіга.
Падраздзяленні арміі Балівіі пад кіраўніцтвам мяцежнага генерала Хуана Хасэ Суньігі ў сераду, 26 чэрвеня, занялі цэнтральную плошчу сталіцы Ла-Пас і пратаранілі з дапамогай бранятэхнікі дзверы ў двор афіцыйнай рэзідэнцыі прэзідэнта Рэспублікі Луіса Арсэ, піша Deutsche Welle.
Пазней прэзідэнт выйшаў да военачальніка, і яны пагаварылі. Праз некаторы час вайскоўцы пачалі адыходзіць ад прэзідэнцкага палаца, а плошчу перад ім занялі прыхільнікі прэзідэнта. Мяцежны генерал быў затрыманы паліцыяй.
«Мы заяўляем міжнароднай супольнасці, што ў Балівіі ідзе спроба дзяржаўнага перавароту супраць нашага дэмакратычна абранага ўрада», — напісаў у сацсетцы Х віцэ-прэзідэнт Балівіі Давід Чокеуанка.
У сваю чаргу прэзідэнт рэспублікі назваў дзеянні падраздзяленняў генерала Суньігі спробай дзяржаўнага перавароту і падзякаваў паліцыі за тое, што тая «засталася вернай дэмакратыі».
Напярэдадні генерал Суньіга быў адпраўлены ў адстаўку з пасады камандуючага ўзброенымі сіламі Балівіі, але ён адмовіўся скласці з сябе паўнамоцтвы.
«Мы вернем сабе радзіму», — заявіў Суньіга, выступаючы на плошчы Мурыльё. Па ягоных словах, мабілізацыя вайсковых падраздзяленняў — гэта дэманстрацыя раздражнення праз «знявагі» вайскоўцаў.
Суньіга заявіў, што зладзіў спробу дзяржаўнага перавароту з мэтай вызваліць палітычных зняволеных і «рэфармаваць дэмакратыю».
«Мы патрабуем неадкладнага вызвалення ўсіх палітычных зняволеных. Не можа быць, каб людзі былі заключаны ў турму за выкананне загаду», — сазаў Суньіга.
Каментары