Прадстаўніца групы жанчын, якія змагаюцца за правы блізкіх, дамаглася адмены прысуду мужу
Вярхоўны суд з‑за недаказанасці віны 23 лютага адмяніў прыгавор і спыніў крымінальную справу ў дачыненні да жыхара Бабруйска Аляксандра Каваленкі.
Каваленка паведаміў, што 19 кастрычніка 2006 года быў затрыманы паводле падазрэння ў распаўсюджванні наркотыкаў і 16 сакавіка 2007 года судом горада Бабруйска і Бабруйскага раёна
асуджаны на дзевяць гадоў калоніі ўзмоцненага рэжыму з канфіскацыяй маёмасці.
На думку Каваленкі, справа супраць яго была сфабрыкавана пасля таго, як ён узняўся на абарону свайго адзінага сына, асуджанага ў студзені 2005 года Магілёўскім абласным судом за забойства на 25 гадоў пазбаўлення волі. «Мы з жонкай лічым, што сын асуджаны незаконна, бо ў матэрыялах справы ёсць супярэчнасці, якія да гэтага часу не ўстаронены чыноўнікамі суда і пракуратуры», — сказаў Каваленка.
Паводле яго слоў,
з моманту затрымання ён стаў змагацца за сваё вызваленне пры актыўнай дапамозе жонкі і падтрымцы групы жанчын, якія пацярпелі ад асабліва цяжкіх злачынстваў,
не згодны з рашэннямі судоў па сваіх грамадзянскіх справах і крымінальных справах сваіх блізкіх.
«Вынікам гэтай барацьбы сталі чатыры перагляды справы.
Я адмовіўся ад умоўна‑датэрміновага вызвалення, а тэрмін майго пакарання зменшыўся з дзевяці гадоў
да трох гадоў і двух месяцаў.
Гэты тэрмін цалкам адпавядаў часу майго знаходжання ў зняволенні», — адзначыў Каваленка.
Незадоўга да вызвалення Каваленка абскардзіў апошні прыгавор, і 23 лютага Вярхоўны суд задаволіў яго скаргу. Зараз пацярпелы мае права звярнуцца ў Магілёўскі абласны суд па кампенсацыю маральнага ўрону.
У інтэрв`ю БелаПАН Валянціна Каваленка заявіла:
«Я ведала, што муж невінаваты, але яго вызваленне запатрабавала велізарных намаганняў. Бо і на мяне спрабавалі распачаць крымінальную справу. І толькі падтрымка групы жанчын дапамагла мне выстаяць і дамагчыся справядлівасці».
Каментары