Каб абараніць тысячы рапух, жаб і трытонаў падчас іх масавай міграцыі да месцаў размнажэння, у горадзе Бат на паўднёвым захадзе Англіі на шэсць тыдняў перакрылі дарогу, піша Бі-бі-сі.
Чарлкомб-Лейн будзе закрыты для транспарту да 23 сакавіка. За тым, каб дарогай не карысталіся матацыклісты, будуць сачыць валанцёры.
Перакрыццё дарог падчас міграцыі земнаводных у Вялікабрытаніі практыкуецца з 2003 года. Да гэтага часу пад коламі машын гінула да 62% земнаводных, якія рухаліся да месцаў размнажэння. У 2024 годзе колькасць загінулых асобін знізілася да 6%.
Мінулагодні сезон стаў адным з самых актыўных за апошнія 14 гадоў. Участак дарогі Чарлкомб-Лейн даўжынёй 0,8 км (палова мілі) тады пераадолелі 3200 амфібій.
Хелен Хобс з Charlcombe Toad Rescue Group адзначыла, што дзякуючы ахоўным захадам мясцовая папуляцыя земнаводных застаецца стабільнай, нягледзячы на агульнае змяншэнне іх колькасці па ўсёй краіне. Але, паводле яе слоў, цяпер настаў «пераломны момант» з-за змены клімату.
«Становіцца ўсё цяжэй прадказаць пікавы час міграцыі амфібій, таму рашэнне закрыць дарогу на шэсць тыдняў цалкам апраўданае», — сказала яна.
Валанцёры, апранутыя ў спецыяльныя святлоадбівальныя курткі, у агульнай складанасці праводзяць каля 600 гадзін, патрулюючы дарогу. Яны выкарыстоўваюць ліхтары і вёдры, у якія збіраюць згубленых амфібій.
Жаб, рапух і трытонаў бяруць у пальчатках, каб пазбегнуць заражэння, і пераносяць да месца размнажэння каля возера.
Эколагі з арганізацыі Froglife збіраюць даныя аб папуляцыях рапух.
Паводле іх даследаванняў, за апошнія 30 гадоў колькасць звычайных рапух скарацілася на 68%. Асноўнымі пагрозамі для гэтых земнаводных, на думку эколагаў, з’яўляюцца транспарт, змена клімату і знішчэнне натуральнага асяроддзя іх пражывання.
Цяпер чытаюць
Хітры расіянін Яўген з жонкай і малым прыдумалі, як бясплатна пажыць у кватэры беларускі19
Каментары